საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარის, კახა კუჭავას განცხადებით, თაბორის მთაზე განსახორციელებელ პროექტთან დაკავშირებით ყველანაირი გეოლოგიური დასკვნა არსებობს და პროექტის განხორციელება სტანდარტების შესაბამისად მოხდება.
ჟურნალისტებთან საუბარში კუჭავა თბილისის საკრებულოს გადაწყვეტილებას გამოეხმაურა და აღნიშნა, რომ ძალიან მალე თაბორის მთაზე წარმოუდგენელი მასშტაბის პროექტი განხორციელდება, რომელიც ყველასთვის ხელმოსაწვდომი იქნება.
„ეს პროექტი, თავისი მოცულობიდან და მნიშვნელობიდან გამომდინარე, ერთ-ერთი ღირსშესანიშნავი ადგილი გახდება. ის ფაქტორი, რომ თანაინვესტირების ფონდი ასოცირებულია ბიძინა ივანიშვილთან, ოპონენტებისთვის ერთადერთ საფუძველს წარმოადგენს, წინასააწარჩევნოდ თემით სპეკულირება მოახდინონ, მაქსიმალურად იყვირონ, ქულები დაიწერონ და მოსახლეობა შეცდომაში შეიყვანონ. ძალიან სამწუხაროა, როდესაც ოპონენტები წინაასარჩევნოდ ყოველანაირ უმსგავსო ხერხს იყენებენ, რათა მოსახლეობა შეცდომაში შეიყვანონ და ისეთი ტყუილები თქვან, რაც ფიზიკურად ვერ დაიმალება. საუბარია პუშკინის სკვერის გასხვისებასთან დაკავშირებით და ფაქტია, რომ სკვერი, რომელზეც ლაპარაკობენ, აბსოლუტურად არ არის იმ გადაწყვეტილების ნაწილი, რომელიც თბილისის საკრებულომ მიიღო“, – აღნიშნა კუჭავამ.
დეპუტატის თქმით, საუბარია უკვე არსებულ ავტოსადგომზე, რომელსაც თავისი ტევადობა აქვს.
„ყველა ძალიან კარგად ვხვდებით, რომ თბილისში საჭიროა პარკინგის დამატებითი ადგილების შექმნა. ამ პროექტის ფარგლებში, ადგილები მინიმუმ გაორმაგდება, თუ არა გასამმაგდება. ერთადერთი კითხვა, რაც მქონდა, გეოლოგიას უკავშირდებოდა და ამ თვალსაზრისითაც პასუხი მოვისმინეთ, რომ გეოლოგია ჩატარებულია და შესაბამისი ნაბიჯებია გადადგმული, ვიდრე ეს პროექტი იქნებოდა წარდგენილი. ძალიან კარგად ვხვდებით, რომ ყველაფერ ამას წინასაარჩევნოდ ქულების ჩაწერის მცდელობა აქვს. მიზანია, იმ საინვესტიციო ჯგუფს ზიანი პირდაპირ მიაყენონ, რომელიც მართლაც უპრეცედენტო ინვესტიციებს ახორციელებს. ის პროექტი, რომელიც თბილისში ხორციელდება, ნამდვილად ერთ-ერთი საამაყო პროექტი იქნება არა მხოლოდ ინვესტიციების ფარგლებში, რომელიც მილიარდს გაუტოლდება, არამედ დასაქმებულთა რაოდენობის კუთხით. ოპონენტებს მოვუწოდებ, კორექტულები იყვნენ და ტყუილებს ნუ გაავრცელებენ მხოლოდ იმიტომ, რომ ორი დღის განმავლობაში, მოსახლეობის თვალში ქულები ჩაიწერონ“, – განაცხადა კუჭავამ.
კახა კუჭავა: თაბორის მთაზე წარმოუდგენელი მასშტაბის პროექტი განხორციელდება, რომელიც ყველასთვის ხელმისაწვდომი იქნება
2017/10/03 18:11:40
კომენტარები
ნანახია: 1230 ჯერ