გიორგი კვირიკაშვილი – არასოდეს დამავიწყდება ჩემი მასწავლებლები, რომლებმაც მასწავლეს რა არის პასუხისმგებლობის გრძნობა

საქართველოს პრემიერ-მინისტრმა, გიორგი კვირიკაშვილმა პედაგოგებს მასწავლებელთა საერთაშორისო დღე მიულოცა.
„მინდა საქართველოს ყველა მასწავლებელს მივულოცო პროფესიული დღესასწაული.
მინდა უდიდესი პატივისცემა გამოვხატო თითოეული მათგანის მიმართ. ეს ის ხალხია, ვისაც ჩვენ ჩვენი შვილების აღზრდას და მათ მომავალს ვანდობთ.
არასოდეს დამავიწყდება ჩემი მასწავლებლები, რომლებმაც მასწავლეს რა არის პასუხისმგებლობის გრძნობა, რომლებმაც მაგრძნობინეს, თუ როგორ შეიძლება ადამიანის მიმართ ერთდროულად განიცადო დიდი რიდი, პატივისცემა, სიყვარული და ამავე დროს, იყო მათი მეგობარი და ამ მეგობრობამ წლებს გაუძლოს.
მასწავლებლობა ერთ-ერთი ყველაზე საპატიო და საპასუხისმგებლო პროფესიაა.
თანამედროვე სახელმწიფოს წარმატება, მისი მოქალაქეების განათლების ხარისხზეა დამოკიდებული, ამაში კი, მასწავლებლის როლი განუზომლად დიდია. ჩვენ ერთად უნდა ვიზრუნოთ, რომ მასწავლებლის პროფესია კიდევ უფრო დაფასდეს.
წარმატებული მასწავლებელი, წარმატებულ მოსწავლეებს და წარმატებულ ახალ თაობას ნიშნავს. ეს კი, ჩვენი ქვეყნის – საქართველოს წარმატების საფუძველია“,- ნათქვამია პრემიერ-მინისტრის ადმინისტრაციის მიერ გავრცელებულ მისალოც წერილში.