კახა კალაძე – მინდა, ბოდიში მოვუხადო მძღოლებს და აქ მცხოვრებ ადამიანებს…

თბილისის მერმა კახა კალაძემ მოსახლეობას და მძღოლებს, რომლებსაც სამუშაოების გამო საცობებში უწევთ დგომა ბოდიში გადაუხადა.
”დღეს ვიმყოფებით ისნის რაიონში, ქეთევან წამებულის ქუჩაზე, სადაც მიმდინარეობს ინფრასტრუქტურული სამუშაოები. ეს არის სანიაღვრე სისტემის კეთილმოწყობითი სამუშაო. სამწუხაროდ, სამუშაოები უკვე დიდი ხანია მიდის, თუმცა ამასაც აქვს თავისი მიზეზი, რადგან დღის განმავლობაში უფლება არ გვაქვს ეს სამუშაოები ვაწარმოოოთ უსაფრთხოებიდან გამომდინარე. მხოლოდ ღამის საათებში ხდება ამ სამუშაოების განხორციელება და მინდა ბოდიში მოვუხადო აქ მცხოვრებ ადამიანებს და ზოგადად მძღოლებს, რომლებიც აქ გადაადგილდებიან, რადგან ხშირია შემთხვევები, როდესაც საცობები იქმნება ზუსტად ამ სამუშაოების გამო. პირობას გაძლევთ, რომ 5 დეკემბრისთვის ეს სამუშაოები იქნება დასრულებული და ზოგადად პრობლემები, რაც აწუხებს მოსახლეობას, საცობებთან და ხმაურთან დაკავშირებით, ძალიან მალე იქნება მოგვარებული. ათეული წლები გაძლებს ეს მილსადენი და სანიაღვრე სისტემა, რომელიც მოემსახურება აქ მცხოვრებ ადამიანებს. 5 დეკემბერს დასრულდება ყველაფერი”, – განაცხადა კალაძემ.