“მნიშვნელოვანია, ოჯახის წევრებიც აქტიურად იყვნენ ჩართულები, რათა მათი შვილები აზარტულ თამაშებზე დამოკიდებულები არ გახდნენ”, – ამის შესახებ ფინანსთა მინისტრის მოადგილემ, ლაშა ხუციშვილმა სამების ახალგაზრდულ ცენტრში განაცხადა, სადაც აზარტული თამაშების შესახებ კანონპროექტს განიხილავენ.
მისივე თქმით, ინტერნეტის ეპოქაში აღნიშნული პრობლემის ბოლომდე მოგვარება რთული იქნება.
„აზარტულ თამაშებთან დაკავშირებით სახელმწიფოს როლი მნიშვნელოვანია, მაგრამ მხოლოდ რეგულაციები ამ პრობლემას ვერ მოაგვარებს. ინტერნეტიზაციის პირობებში, საკმაოდ რთული იქნება ამ პრობლემის ბოლომდე მოგვარება, ამიტომ მნიშვნელოვანია, ოჯახის წევრებიც აქტიურად იყვნენ ჩართულები, რათა მათი შვილები აზარტულ თამაშებზე დამოკიდებულები არ გახდნენ, თუმცა ის რეგულაციები, რომლებზეც მთავრობა მუშაობს, მნიშვნელოვნად შეამცირებს აზარტულ თამაშებზე დამოკიდებულებას“, – განაცხადა ლაშა ხუციშვილმა.
შეგახსენებთ, რომ პარლამენტში აზარტული თამაშების შესახებ კანონპროექტი უკვე შესულია, რომელიც აზარტულ თამაშებზე ახალი რეგულაციების ამოქმედებას ითვალისწინებს. საკანონმდებლო ორგანოში ინიცირებული კანონპროექტით, აზარტული თამაშები 18-ის ნაცვლად, დაშვებული იქნება 21 წლიდან. გარდა ამისა, რეგისტრაციისთვის, შესაძლოა, სათამაშო ობიექტზე მისვლა გახდეს სავალდებულო, სადაც ადგილზე შეამოწმებენ აქვს თუ არა მოქალაქეს თამაშის უფლება.