“ასე უნდა მივხედოთ ჩვენს ქალაქს. ყველაფერს გავაკეთებ იმისთვის, რომ საზოგადოების ჩართულობა იყოს ქალაქის განვითარებაში”, – ამის შესახებ თბილისის მერმა, კახა კალაძემ გმირთა მოედანზე, მიწისქვეშა გადასასვლელში სამხატვრო სამუშაოების დათვალიერების შემდეგ განაცხადა.
როგორც მან აღნიშნა, სხვა მიწისქვეშა გადასასვლელებსაც მიექცევა ყურადღება, რადგან ამით ძალიან ბევრი ადამიანი სარგებლობს.
“გახსოვთ, აქ ძალიან მძიმე სიტუაცია იყო. დღეს გვაქვს აბსოლუტურად განსხვავებული. მინდა ახალგაზრდებს დიდი მადლობა გადავუხადო, რომ დაიწყეს მოხატვა. ძალიან მიხარია, რომ ბევრი ადამიანია ჩართული ამ ყველაფერში. ასე უნდა მივხედოთ ჩვენს ქალაქს. ყველაფერს გავაკეთებ იმისთვის, რომ საზოგადოების ჩართულობა იყოს ქალაქის განვითარებაში. ძალიან მიხარია ეს სოლიდარობა, ახალგაზრდებმა გამოიჩინეს ინიციატივა და ალამაზებენ თავიანთ ქალაქს. ჩვენ ყველანაირად ხელს შევუწყობთ მათ. რაც შეეხება სხვა მიწისქვეშა გადასასვლელებს, მე მაქვს ინფორმაცია, რომ წინამძღვრიშვილზეც ძალიან მძიმე მდგომარეობაა და ხვალ ვაპირებთ მივიდეთ. გამოვასწორებთ მდგომარეობას, რადგან ძალიან ბევრი ადამიანი სარგებლობს მიწისქვეშა გადასასვლელებით. სისუფთავე და მოწესრიგებულობა იქნება მნიშვნელოვანი”, – განაცხადა კალაძემ.
შეგახსენებთ, რომ დედაქალაქში არსებული მიწისქვეშა გადასასვლელების მოხატვის მსურველები თბილისის მერიასა და „თბილსერვის ჯგუფს“ სოციალური ქსელისა და ცხელი ხაზის საშუალებით დაუკავშირდნენ, რის შემდეგაც, „თბილსერვის ჯგუფის“ ორგანიზებით, მხატვრებისგან შემდგარი საინიციატივო ჯგუფი ჩამოყალიბდა. სწორედ ასე შეირჩა 30 მხატვარი, რომლებიც გმირთა მოედნის მიწისქვეშა გადასასვლელის მოხატვაზე მომდევნო ერთი კვირის განმავლობაში იზრუნებენ.
კახა კალაძის დავალებით, გმირთა მოედნის მიწისქვეშა გადასასვლელში „თბილსერვის ჯგუფმა“ მორეცხვითი სამუშაოები განახორციელა. პარალელურად, მოეწყო განათების ქსელი და დამონტაჟდა ანტივანდალური LED სანათები. თბილისის მერის, კახა კალაძის ინიციატივით, ეტაპობრივად, „თბილსერვის ჯგუფის“ პატრონაჟის ქვეშ მყოფი სხვა მიწისქვეშა გადასასვლელებიც მოიხატება.
