დედაქალაქის მერის, კახა კალაძის განცხადებით, თუ მოხდება მიწისქვეშა გადასასვლელების იჯარით გადაცემა, ხელშეკრულებაში ჩაიწერება, რომ მეპატრონე ვალდებულია, მის მოვლა-პატრონობასა და კამერების დამონტაჟებაზე იზრუნოს. აღნიშნულთან დაკავშირებით, მან ჟურნალისტებთან ისაუბრა.
“ჩვენ გვინდა პირველი პროექტი გმირთა მოედანზე განვახორციელოთ, სადაც განთავსდება კამერები. ასე ვაპირებთ ყველა მიწისქვეშა გადასასვლელის მოწყობას, მოსუფთავებას, მოპირკეთებას, რადგან რაც შეიძლება მეტმა ადამიანმა ისარგებლოს. არ გვინდა, რომ ცენტრალურ ქუჩებზე ადამიანები გადადიოდნენ იქ, სადაც საშიშროებაა. უამრავი ავტოსაგზაო შემთხვევა ხდება. გვინდა, ყველაფერი მოვაწესრიგოთ და ადამიანებს ვუთხრათ, რომ ეს კეთდება მათთვის. მეპატრონეებთან თუ მოიჯარეებთან, ინდივიდუალურად გვექნება გასაუბრება. მაგალითად, გვქონდა გასაუბრება წინამძღვრიშვილის მიწიქვეშა გადასასვლელის მფლობელთან და ვუთხარით, რომ იქ ანტისანიტარიაა და შეუძლებელია ადამიანების გადასვლა – გადმოსვლა. ეს ადამიანები დაგვთანხმდნენ იმაზე, რომ აუცილებლად უნდა მოწესრიგდეს. მიხარია, რომ ადამიანები უკვე გვეხმარებიან, გვერდით გვიდგანან და იციან, ეს რამდენად მნიშვნელოვანია”, – განაცხადა კახა კალაძემ.