“ქართული ოცნების” ფრაქციის თავმჯდომარემ, მამუკა მდინარაძემ ბერი გაბრიელ სალოსის ქუჩაზე დასრულებულ სპეცოპერაციასთან დაკავშირებით გამართულ ბრიფინგზე ძალოვან უწყებებს მადლობა გადაუხადა. მდინარაძემ დაღუპული სპეცრაზმელის ოჯახს სამძიმარი გამოუცხადა.
მდინარაძის განცხადებით, ფრაქცია უერთდება პრემიერ-მინისტრის მიმართვას, რომ პოლიტიკოსებმა და ანალიტიკოსებმა თავი შეიკავონ პოპულისტური და ნაჩქარევი განცხადებებისგან, რადგან საქმე ქვეყნის უსაფრთხოებას ეხება.
“ძალიან მნიშვნელოვანია, რომ სპეცოპერაციის დროს მოსახლეობის უსაფრთხოების დაცვის ხარისხი ყველა სამსახურის მწყობრი და შეთანხმებული მუშაობის შედეგად უმაღლეს დონეზე იყო აყვანილი, ამისთვის ასევე დიდ მადლობას ვუხდით სამართალდამცველ ორგანოებს. ჩვენი მხრიდან გვინდა შევუერთდეთ პრემიერის მოწოდებას და ჩვენც მოვუწოდოთ სხვადასხვა პოლიტიკოსებს თუ ექსპერტებს, თავი შეიკავონ ნაჩქარევი და რიგ შემთხვევებში, პოპულისტური განცხადებების გაკეთებისგან, ვინაიდან მოცემულ შემთხვევაში საქმე არ ეხება რომელიმე პოლიტიკური ჯგუფის, არამედ ქვეყნის სახელმწიფო და საზოგადოებრივი უსაფრთხოების ინტერესებს. ამიტომ, ყველას ვთხოვთ, გაათვიცნობიერონ თითოეული განცხადების თუ თითოეული ფრაზის მოსალოდნელი ნეგატიური შედეგები, აქედან გამომდინარე ჩვენ ვთხოვთ ჩვენს კოლეგებს, ასევე თავი შეიკავონ ნეგატიური განცხადებების გაკეთებისგან, გვექნება ჩვენ იმის დრო, რომ ამაზე დისკუსია გავმართოთ“, – განაცხადა მდინარაძემ.