ისტორიკოსი სერგო ვარდოსანიძე სოციალურ ქსელში შემდეგი სახის პოსტს აქვეყნებს:
„სახელმწიფოებრივი აზროვნების დეფიციტი…
2017 წლის 22 ნოემბერი, დილიდანვე ნათელი გახდა, რა რთული გამოცდის წინაშე დადგა საქართველო, მთელი დღე ძალოვანი უწყებების წარმომადგენლები მაქსიმალურად ცდილობდნენ მოსახლეობის დაცვას ტერორისტებისაგან და მათ სასახელოდ უნდა ითქვას, თავიდან აიცილეს მშვიდობიან მოსახლეობაში მსხვერპლი და პანიკა. დასანანია, რომ სპეცოპერაციის დროს დაიჭრა რამდენიმე და დაიღუპა ერთი სპეცრაზმელი. დიდი მორალური და მატერიალური ზიანი მიადგა ჩვენს მოქალაქეებს… ამ დროს, ჩვენი ტელევიზიები პირდაპირ ეთერში აჩვენებდნენ სპეცოპერაციის მიმდინარეობას, ცდილობდნენ რაც შეიძლება მეტი მძიმე ინფორმაციის მოპოვებას, ნაწილმა კი პანკისის ხეობისაკენ გაქუსლა…
რა გინდათ იქ?
რატომ აყენებთ უხერხულ მდგომარეობაში ბატონ ხასო ხანგოშვილს, ზაურ გუმაშვილს? ხეობის მშვიდობიან მოსახლეობას?
ტერორიზმს ეროვნება არ აქვს…
დამთავრდა სპეცოპერაცია და სატელევიზიო სივრცეში თუ სოციალურ ქსელში კომპიუტერთან მშვიდად მყოფნი დილეტანტები და ოპოზიციური პარტიების წარმომადგენლები იწყებენ ჩვენი ძალოვანი სტრუქტურების და მთავრობის განქიქებას, სამწუხაროდ და ჩვენდა სავალალოდ, ეს სახელმწიფოებრივი აზროვნების დეფიციტის გამოვლინებაა…
ნუთუ, ამ განსაცდელმა მაინც არ უნდა დაგვანახოს, რომ აუცილებელია ეროვნული და სახელმწიფოებრივი ინტერესების გარშემო ჩვენი გაერთიანება?
ფრთხილად, ბატონებო, სკამებისა და გავლენებისთვის ბრძოლამ იქამდე არ მიგვიყვანოს, რომ იმ სკამების დასადგმელი ადგილი აღარ დაგვრჩეს.
ჩემი მადლობა და მხარდაჭერა ძალოვნებს, ხელისუფლებას… ამისკენ მოგიწოდებთ თქვენც”, – წერს ვარდოსანიძე.