საქართველოს პარლამენტმა იმერეთის რეგიონის საოჯახო ტიპის ბავშვთა სახლების და დღის ცენტრების ბენეფიციარებს ქუთაისის ლადო მესხიშვილის სახელობის პროფესიულ დრამატულ თეატრში საახალწლო სპექტაკლზე უმასპინძლა. თეატრში მოწვეულმა ბავშვებმა ვაჟა-ფშაველას მოთხრობის მიხედვით დადგმული საახალწლო სპექტაკლი „სათაგური“ ნახეს. სტუმრებს პარლამენტის თავმჯდომარის პირველმა მოადგილემ თამარ ჩუგოშვილმა და ქუთაისის მაჟორიტარმა დეპუტატებმა სამახსოვრო საჩუქრები გადასცეს.
„საქართველოს პარლამენტს აქვს პატივი, ქუთაისში უმასპინძლოს პატარებს საახალწლო ღონისძიებაზე, საახალწლო სპექტაკლზე. ჩვენთვის ეს არის წლის ყველაზე სასიამოვნო მოვლენა, როდესაც ბავშვებთან ერთად შეგვიძლია დავემშვიდობოთ ძველ წელს და ახალი მოლოდინებითა და იმედებით შევხვდეთ ახალს. ბავშვები არიან ყველაზე ძვირფასი, ყველაზე საყვარელი ნაწილი ჩვენი ქვეყნის, ჩვენი საზოგადოების და მინდა მათ ვუსურვო ძალიან წარმატებული, ლაღი, ხალისიანი მომავალი 2018 წელი“, – განაცხადა თამარ ჩუგოშვილმა.
ქუთაისის მაჟორიტარი დეპუტატის, გენადი მარგველაშვილის თქმით, ტოლერანტობა და თანადგომა უაღრესად მნიშვნელოვანია ჩვენი საზოგადოებისთვის.
„განსაკუთრებით ბოლო 4-5 წლის განმავლობაში იგრძნობა გამოცოცხლება ამ მიმართულებით. ჩვენ უნდა მოვახერხოთ შეზღუდული შესაძლებლობების მქონე ბავშვებთან მისვლა და მათი შესაძლებლობების, მათი სილამაზის დანახვა. ხშირად ისინი ჩვენზე ბევრად ძლიერები და უკეთესები არიან. ბედნიერი ვარ, რომ პარლამენტი ქუთაისში მასპინძლობს ამ პატარებს. თითოეულ ბავშვს ვუსურვებ, დამდეგი ახალი წელი მათ ოჯახებში იყოს ლამაზი, გაბრწყინებული, პოზიტივით და სიყვარულით სავსე“, – განაცხადა გენადი მარგველაშვილმა.