გიორგი მღებრიშვილი – ვინც თვლის, რომ საპოლიციო კონტროლის დროს მათი უფლებები დაირღვა, შესაბამის სამსახურებს უნდა მიმართოს

იმ ადამიანებმა, ვინც თვლიან, რომ საპოლიციო კონტროლის დროს მათი უფლებები დაირღვა, ან სამართალდამცველების მხრიდან დაფიქსირდა რაიმე გადაცდომა, შესაბამის სამსახურებს უნდა მიმართონ, – ამის შესახებ შინაგან საქმეთა მინისტრმა გიორგი მღებრიშვილმა ჟურნალისტებს განუცხადა.
როგორც მღებრიშვილმა აღნიშნა, საპოლიციო კონტროლი თვეში ერთხელ, ორი დღის განმავლობაში ტარდება.
„ეს არ არის რეიდები. ეს არის საპოლიციო კონტროლი, რასაც სამინისტრო პერიოდულად ახორციელებს. რაც შეეხება გადაცდომებს, დარღვევებს, ამისთვის არსებობს შესაბამისი სამსახურები, სადაც შეუძლიათ მიმართონ იმ ადამიანებმა, რომლებიც თვლიან, რომ დაირღვა მათი უფლებები, ან დააფიქსირეს პოლიციელთა მხრიდან რაიმე გადაცდომა. საპოლიციო კონტროლი ძალიან დიდი ხანია ხორციელდება, თვეში ერთხელ ორი დღის განმავლობაში“, – განაცხადა გიორგი მღებრიშვილმა.