მეუღლისა და შვილის მკვლელობაში ბრალდებულ მაგდა პაპიძესა და საქმის მთავარ გამომძიებელ ნუგზარ ნათელაშვილს შორის სასამართლო პროცესზე კამათი მოხდა. მაგდა პაპიძემ გამომძიებელს ჰკითხა, რატომ არ გააცნეს მას უფლებები და რატომ არ უთხრეს, რომ ჰქონდა დუმილისა და ადვოკატის გამოყენების უფლება.
“სამხილებელი თქვენ ხართ პირველ რიგში ჩემი მხრიდან. ამ ქვეყანაში არაფერს აზრი არ აქვს. რატომ არ გამაცნეს ჩემი უფლებები, რომ დუმილის უფლება მქონდა?!”,- განაცხადა მაგდა პაპიძემ, რაზეც გამომძიებელმა უთხრა, რომ იმ დროისთვის მას მოწმის სატატუსი ჰქონდა და აქედან გამომდინარე არ ჰქონდა დუმილის უფლება, მხოლოდ ადვოკატის ყოლის უფლება ჰქონდა. “მაგდა, ჭკვიანი გოგო ხარ და უნდა გახსოვდეს, რომ შემოგთავაზეთ ამ უფლების გამოყენება”, – მიმართა გამომძიებელმა ბრალდებულ პაპიძეს.
ამის საპასუხოდ ბრალდებულმა გამომძიებელს მისი ფიზიკური დაზიანებები შეახსენა. “თქვენ როცა გინდათ ჭკვიანს მეძახით, როცა გინდა შეურაცხადს. მესამე დღეს გამაცნეს უფლებები. გამომძიებელ თამარ ზედგენიძეს ვთხოვდი ადვოკატს, მაგრამ მეუბნებოდა, ამის უფლება არ გაქვსო. ზედგენიძე ჩემს შვილს ხორცმეტს ეძახდა. ხელებზე დაზიანება იმიტომ მქონდა, რომ ჩემს შვილს ხელოვნური სუნთქვის მასაჟს ვუტარებდი. კატეგორიულად უარყოფთ თქვენ ჩემს წამებას, მიუხედავად იმისა, რომ თქვენ არ შემოსულხართ ოთახში. სასწრაფო არ გამოიძახეს როდესაც ცუდად ვიყავი. თურმე ოთარ ბერძენიშვილი იკითხებოდა იმ დროს. პოლიციელი შემოვიდა და იმ პოლიციელებს, რომლებიც ჩემთან ოთახში იყვნენ, უთხრა, დაადოს ხელი ბერძენიშვილს, თორემ სიკვდილს ჩავახედებ თვალებშიო. იძულებულს მხდიდა ხელი დამედო. 4 კაცთან ფიზიკური შეხლა-შემოხლა მომივიდა, რომ თავი დაენებებინათ. ქურთუკი დამახიეს და სისხლნაჟღენთები მქონდა”, – განაცხადა მაგდა პაპიძემ.
