დავით ნარმანიას განცხადებით, თბილისში ჰაერის დაბინძურების თვალსაზრისით საგანგაშო მდგომარეობა არ არის

თბილისის მერის, დავით ნარმანიას განცხადებით, თბილისში ჰაერის დაბინძურების თვალსაზრისით საგანგაშო მდგომარეობა არ არის,- შესაბამისი კომენტარი თბილისის მერმა დავით ნარმანიამ საერთაშორისო ენერგეტიკული სააგენტოს მიერ გამოქვეყნებულიკვლევის შეფასებისას გააკეთა, რომლის მიხედვით, საქართველოში ჰაერის დაბინძურების გამო ყოველი 100 ათასიდან 290 ადამიანი იღუპება.
თბილისის მერის თქმით, ინტენსიურად მიდის მუშაობა გამწვანების თვალსაზრისით, რათა თბილისი უფრო მეტად მწვანე ქალაქი იყოს და დაბინძურების დონემ ქალაქში მნიშვნელოვნად დაიკლოს.
„აბსოლუტურად საგანგაშო მდგომარეობა, ჩემს ხელთ არსებული ინფორმაციით, არ არის, თუმცა არის ცალკეული გადატვირთული უბნები, გამომდინარე ტრანსპორტის სიჭარბიდან, გამომდინარე იქიდან, რომ წლების განმავლობაში მწვანე საფარს ასეთ ადგილებში ყურადღება არ ექცეოდა. სწორედ ამიტომ გაზზე მომუშავე ავტობუსებზე გამოვაცხადეთ ტენდერი. ასევე ინტენსიურად ვმუშაობთ გამწვანების თვალსაზრისით, რათა თბილისი უფრო მეტად მწვანე ქალაქი იყოს და დაბინძურების დონემ ქალაქში მნიშვნელოვნად დაიკლოს“, – განაცხადა დავით ნარმანიამ.
თბილისის მერმა კომენტარი სასტუმრო „ჰოლიდეი ინში“ გააკეთა, სადაც მდგრადი ენერგეტიკის კვირეულის ფარგლებში კონფერენცია მიმდინარეობს, რომელიც თბილისის ენერგოეფექტურ ქალაქად გარდაქმნის საკითხებს იხილავს.