“არანაირ ძალისმიერ ოპერაციაში და არანაირ დაკავებაში არ მიგვიღია მონაწილეობა”

გია დგებუაძემ 2006 წელს, ნავთლუღში ჩატარებული სპეცოპერაცია გაიხსენა და აღნიშნა, რომ მას და იმჟამად მის დაქვემდებარებაში მყოფ დანაყოფს დაკავების ოპერაციაში მონაწილეობა არ ევალებოდა.
“ჩემთვის ცხადია, რაზეა აგებული ბრალდების სტრატეგია. ცოტა სიმართლისა და ბევრი ტყუილის გარევით ცდილობენ, შეცდომაში შეიყვანონ სასამართლო და ჩემი პიროვნება გამოიყვანონ ისეთად, რომ ნებისმიერ დანაშაულზე ვარ წამსვლელი. მე არანაირად არ ვარ წინააღმდეგი სახელმწიფოსთან თანამშრომლობის, გარდა ერთისა, როცა საქმე გვაქვს სიცრუესთან და ტყუილთან. არანაირ ძალისმიერ ოპერაციაში და არანაირ დაკავებაში არ მიგვიღია მონაწილეობა არც მე და არც ჩემს დანაყოფს, იმიტომ რომ ეს არ გვქონდა დავალებული”, – განაცხადა გია დგებუაძემ.
ამასთან, როგორც ბრალდებულმა აღნიშნა, სახელმწიფო ბრალდებას არ გააჩნია არავითარი უტყუარი მტკიცებულება იმისა, რომ მან დანაშაული ჩაიდინა. მისივე თქმით, ”გამოძიებას არ ჩაუტარებია არც ბალისტიკური ექსპერტიზა და თავს იმართლებს სხვადასხვა მიზეზით”.
“მიჩნდება საფუძვლიანი ეჭვი, რომ საქართველოს პროკურატურა, ქვეყანაში შექმნილი პოლიტიკური კონიუნქტურის გამო იძულებულია წარმოაჩინოს საქმის არა რეალური ვითარება, არამედ საკუთარი ინტერპრეტაცია, სკანდალური სახე მისცეს მას და გამოიყენოს ისეთი ადამიანების წინააღმდეგ, რომლებიც სხვადასხვა მიზეზის გამო საზოგადოებისთვის მიუღებლები არიან. ეს იყო ორდინალური სპეცოპერაცია, რომელიც დამთავრდა ტრაგიკულად და ამის გამოყენება სხვა მიზნებისთვის, თუნდაც პოლიტიკური თუ სუბიექტური მიზნებისთვის დაუშვებლად მიმაჩნია”, – განაცხადა გია დგებუაძემ სასამართლო პროცესზე.
დღევანდელ სხდომაზე ბრალდებისა და დაცვის მხარეებმა შესავალი სიყტყვები წარმოთქვეს. ბრალდების მხარემ სასამართლოს საქმის არსი და იმ მტკიცებულებების შინაარსი გააცნო, რაც, პროკურატურის მტკიცებით ე.წ. ნავთლუღის სპეცოპერაციის საქმეზე, ბრალდებულების, დათა ახალაიასა და გია დგებუაძის, მეტსახელად ”მასტერას” დანაშაულს ამტკიცებს. დაცვის მხარემ კი ბრალდების აბსურდულობაზე გაამახვილა ყურადღება და სამართალწარმოების პროცესში არსებულ ხარვეზებზე ისაუბრა.