შსს-ს მაშველები შუახევში სამაშველო ღონისძიებებს მთელი ღამის განმავლობაში ახორციელებდნენ

შსს-ს საგანგებო სიტუაციების მართვის სააგენტოს მაშველებმა შუახევის მუნიციპალიტეტის ოთხი სოფლის – ცინარეთის, წაბლანას, მოფრინეთისა და ლაკლაკეთის მოსახლეობას, რომლებიც ძლიერი წვიმის გამო დაზარალდნენ, დახმარება აღმოუჩინეს.
როგორც საგანგებო სიტუაციების მართვის სააგენტოში აცხადებენ, უხვი ნალექის გამო ადიდებულმა მდინარე ტბეთისწყალმა გზა დააზიანა, კაპიტალური ხიდი წაიღო და სტიქიის ზონაში მცხოვრები მოსახლეობა გარესამყაროს მოწყვიტა. შსს-ს საგანგებო სიტუაციების მართვის სააგენტოს მაშველები ოპერატიულად გამოცხადდნენ შემთხვევის ადგილზე და ადგილობრივი მაცხოვრებლები მეწყერსაშიში ზონიდან უსაფრთხო ადგილზე გადაიყვანეს. მაშველებმა მოახერხეს მდინარეში გადავარდნილი ავტომანქანისა და მძღოლის უვნებლად ამოყვანა.
სამაშველო, გაწმენდითი და აღდგენითი სამუშაოები მთელი ღამის განმავლობაში მიმდინარეობდა. საგანგებო სიტუაციების მართვის სააგენტოს მაშველები, პრევენციის მიზნით, ამ დრომდე სტიქიის ყველა ზონაში იმყოფებიან.