თაღლითობის ფაქტზე თბილისის საკრებულოს ყოფილი თანამშრომელი დააკავეს

სამართალდამცველებმა თაღლითობის ფაქტზე, თბილისის საკრებულოს მიწის საკუთრების უფლების აღიარების კომისიის მომსახურების განყოფილების ყოფილი თანამშრომელი, დავით გასოევი დააკავეს.
”საქმეზე ჩატარებული გამოძიებით დადგენილია, რომ ბრალდებული ერთ-ერთ მოქალაქეს მოტყუებით დაჰპირდა, რომ ქალაქ თბილისში, მიწის ნაკვეთის საკუთრების უფლების მოპოვებაში დაეხმარებოდა, რისთვისაც გამოიყენებდა საკუთარ კავშირებს ქალაქ თბილისის საკრებულოს წევრებთან, სანაცვლოდ კი მოითხოვა 4 000 აშშ დოლარი. საგამოძიებო სამსახურმა ბრალდებული თანხის ნაწილის, 2 000 დოლარის აღების ფაქტზე დააკავა”, – ნათქვამია ფინანსთა სამინისტროს საგამოძიებო სამსახურის მიერ გავრცელებულ ინფორმაციაში.
საქმეზე გამოძიება საქართველოს სისხლის სამართლის კოდექსის 180-ე მუხლის პირველი ნაწილით მიმდინარეობს, რაც სასჯელის სახით 2-დან 4 წლამდე თავისუფლების აღკვეთას ითვალისწინებს.