იუსტიციის სახლმა შშმ პირებისთვის, მომსახურების სტანდარტის გაუმჯობესების მიზნით, თანამშრომლების გადამზადების პროცესი დაიწყო

იუსტიციის სახლმა შეზღუდული შესაძლებლობების მქონე პირებისთვის მომსახურების სტანდარტის გაუმჯობესების მიზნით თანამშრომლების გადამზადების პროცესი დაიწყო. პირველი ასეთი ტრენინგი 2 და 3 ივლისს თბილისის, ქუთაისისა და ბათუმის იუსტიციის სახლის 17 თანამშრომელს ჩაუტარდება.
ტრენინგების მიზანს, იუსტიციის სახლისთვის 17 ინსტრუქტორის მომზადება წარმოადგენს. მომავალი ინსტრუქტორები გაივლიან ტრენინგს და შეისწავლიან შეზღუდული შესაძლებლობების მქონე პირებთან კომუნიკაციისთვის საჭირო ტერმინოლოგიასა და ეტიკეტს, შემდგომში კი ტრენერის ფუნქციას თავად შეითავსებენ და ფილიალის ოპერატორების ეტაპობრივ გადამზადებას დაიწყებენ.
თანამშრომლების გადამზადებასთან ერთად, პროექტი შეზღუდული შესაძლებლობების მქონე პირებისთვის მომსახურების დარბაზში გადაადგილებისა და საჭირო ინფორმაციის აღქმის გამარტივებასაც მოიცავს. კერძოდ, სმენადაქვეითებულ ან/და მეტყველების შეფერხების მქონე პირებს ჟესტების ენის მცოდნე ოპერატორები მოემსახურებიან. გარდა ამისა, იუსტიციის სახლში დამონტაჟდება სპეციალური, სანავიგაციო სისტემა, რაც მომსახურების დარბაზში უსინათლოთა გადაადგილებას შეუფერხებელს და დამოუკიდებელს გახდის.
პროექტი ხორციელდება ევროკავშირის ფინანსური მხარდაჭერით, გაეროს ერთობლივი პროგრამის „ადამიანის უფლებები ყველასათვის“ ფარგლებში, რომელშიც ჩართულია გაეროს ოთხი სააგენტო – გაეროს განვითარების პროგრამა (UNDP), გაეროს ბავშვთა ფონდი (UNICEF), ადამიანის უფლებათა დაცვის უმაღლესი კომისარიატი (OHCHR) და შრომის საერთაშორისო ორგანიზაცია (ILO). ტრენინგებს კი კოალიცია „დამოუკიდებელი ცხოვრებისთვის“ ხელმძღვანელი გიორგი ძნელაძე და ამავე ორგანიზაციის ტრენერი ნიკა დონჯაშვილი ჩაატარებენ.
შეზღუდული შესაძლებლობების მქონე პირთა მომსახურების გასამარტივებლად მომზადებული პროექტი, რომელსაც იუსტიციის სახლი ახორციელებს საქართველოში უპრეცედენტოა. პროექტის საწყის ეტაპზე, იმ ადამიანებისთვის, რომელთაც სპეციალური საჭიროებები გააჩნიათ იუსტიციის სახლები უკვე აღიჭურვა შესაბამისი ინფრასტრუქტურით: აშენდა პანდუსები, გაიმართა სველი წერტილები, განხორციელდა განსაკუთრებული საჭიროების მქონე ადამიანებისათვის ეტლების შესყიდვა.