პრემიერმინისტრ გიორგი კვირიკაშვილის განცხადებით, ნარკოპოლიტიკასთან დაკავშირებით გუშინ დაპირებები გაიცა და უახლოესი კვირების განმავლობში, პარლამენტში კანონპროექტის საბოლოო ვერსია გავა.
პრემიერმა განმარტა, რომ კანონპროექტის საბოლოო ვერსია მომხმარბლების მიმართ ჰუმანურ დამოკიდებულებას ითვალისწინებს.
“რაც შეეხება ნარკოპოლიტიკას, გუშინ იყო ამაზე საუბარი და გაიცა დაპირებებიც, რომ უახლოესი კვირების განმავლობაში, უახლოეს პერიოდში პარლამენტში გავა კანონპროექტის საბოლოო ვერსია, რომელიც ითვალისწინებს ერთი მხრივ მნიშვნელოვან ლიბერალიზაციას და გაცილებით უფრო ჰუმანურ დამოკიდებულებას მომხმარებლების მიმართ, მათ შორის სამედიცინო სერვისებით შევსებას, შესაბამისი ფსიქო-სოციალური რეაბილიტაციების კომისიების ჩამოყალიბებას და ასევე – ძალიან მკაცრ მიდგომას ნარკორეალიზატორებისა და ნარკოტრაფიკის მიმართ, რასაც სახელმწიფო ვერასოდეს შეეგუება”, – განაცხადა პრემიერმინისტრმა გიორგი კვირიკაშვილმა.
პრემიერის თქმით, 15 მაისს გაიმართება შეხვედრა, რომელშიც მთავრობის წევრები, თბილისის მერი და პარლამენტარები მიიღებენ მონაწილეობას.
“ჩვენ ვისაუბრებთ ხელისუფლების კომპლექსურ გეგმაზე ჯანსაღი ცხოვრების წესის დამკვიდრების, შესაბამისი ინფრასტრუქტურის შექმნისა დაა ხელმისაწვდომობის კუთხით. ეს იქნება კომპლექსური, საყოველთაო ჩართულობის გათვალისწინებით შედგენილი გეგმა, რომლის აღსრულებაში, დარწმუნებული ვარ, კერძო სექტორიც დიდი ენთუზიაზმით ჩაერთვება”, – განაცხადა პრემიერმა.