ვფიქრობ, რომ პარლამენტში არსებობს რესურსი იმისა, რომ დათქმულ დროში მოვახერხოთ შეთანხმების მიღწევა, – ამის შესახებ საპარლამენტო უმრავლესობის წევრმა, დიმიტრი ხუნდაძემ განაცხადა.
“ბევრ საკითხთან მიმართებაში ჩვენ უკვე ვართ შეთანხმებული. კერძოდ, ქვეყანაში ნარკოპოლიტიკა უნდა შეიცვალოს, ნარკომომხმარებლები პოლიციური ზედამხედველობიდან უნდა გადმოვიდნენ ჯანდაცვის სექტორში, უნდა ვაწარმოოთ მძლავრი ანტინარკოტიკული კამპანია და დაუნდობელი ბრძოლა უნდა გამოვაცხადოთ ნარკოგამსაღებლების მიმართ. ეს არ უნდა იყოს ერთჯერადი, ეს უნდა იყოს მრავალჯერადი, ვიდრე ეს პრობლემა იქნება ქვეყანაში. არის შეუთანხმებელი საკითხებიც, თუმცა იმაზე ნაკლები, ვიდრე აქამდე იყო. მაგრამ ყველა საკითხი უნდა იყოს შეთანხმებული, რათა ჩვენ მივიღოთ სწორად დაგეგმილი, სწორად გათვლილი და განხორციელებული რეფორმა, რომ ქვეყანაში ნარკომომხმარებელთა რიცხვი იყოს შემცირებული. წინააღმდეგ შემთხვევაში, უკეთესის ძიებაში შეიძლება უარესი მივიღოთ. მე ვფიქრობ, რომ პარლამენტში არსებობს რესურსი იმისა, რომ დათქმულ დროში მოვახერხოთ შეთანხმების მიღწევა”, – განაცხადა ხუნდაძემ.
მისივე თქმით, ეს პროცესი უნდა დარჩეს პარლამენტში, ვინაიდან აქ არის რესურსი, რომ საკითხი სწორად იქნას დაგეგმილი და შეთანხმებული – “დავანებოთ ქუჩიდან პროცესების მართვას თავი”.
“მე ვითხოვ იმას, რომ საკითხი იქნას განხილული იმ რეჟიმში, რომ ყველამ ერთად, მათ შორის მედიამაც, საზოგადოების ყველა წევრმა ვაწარმოოთ ქვეყანაში მძლავრი ანტინარკოტიკული პოლიტიკა. უნდა გამოვაცხადოთ დაუნდობელი ბრძოლა ნარკოტიკების გამსაღებლების მიმართ. სწორად უნდა იქნას დაწესებული სამართლებრივი რეგულაციები, დეფინიციები. საჯარიმო სახდელების კოდექსები უნდა იყოს ადეკვატური, რომ ის აღწევდეს მიზანს. უნდა იქნას ჯანდაცვის სექტორი სწორად დაგეგმილი და რეფორმა ფინანსურად უნდა იყოს მყარად გაწერილი. ასეთ შემთხვევაში, ჩვენ მივიღებთ ისეთ ნარკოპოლიტიკას, რომელიც ქვეყნისთვის იქნება მნიშვნელოვანი”, – აღნიშნა ხუნდაძემ.