პრემიერ-მინისტრ გიორგი კვირიკაშვილის განცხადებით, ვიზალიბერალიზაციის შემდეგ, ბრიუსელში გამართულ მიღებაზე ევროკომისარმა ევროპის საშინაო მიგრაციისა და მოქალაქეობის საკითხებში დიმიტრის ავრამოპულოსმა განაცხადა,“რომ არ ყოფილიყო საბჭოთა ოკუპაცია, საქართველო აუცილებლად იქნებოდა ევროკავშირის დამფუძნებელ მამათა შორის”.
ეს ფაქტი კვირიკაშვილმა დიასპორის დღისადმი მიძღვნილ ფორუმზე სიტყვით გამოსვლისას გაიხსენა. პრემიერ-მინისტრი განსაკუთრებით მიესალმა ფორუმის მონაწილე, პირველი დემოკრატიული რესპუბლიკის დაფუძნებლების შთამომავლებს და მათ პირველი დემოკრატიული რესპუბლიკის 100 წლის იუბილე მიულოცა.
„მინდა, გავიხსენო ერთი ძალიან საინტერესო განცხადება, როდესაც საქართველომ ევროკავშირთან ვიზალიბერალიზაციას მიაღწია და ჩვენ პირველად უვიზოდ გავემგზავრეთ ჯერ ევროპის კულტურულ დედაქალაქ ათენში, ხოლო შემდეგ პოლიტიკურ დედაქალაქ ბრიუსელში, ქართველ სტუდენტებთან, ახალგაზრდებთან ერთად. იმ საღამოს მიღება გვქონდა ბრიუსელში, ჩვენს საელჩოში. ამ მიღებაზე, ევროკომისარმა ევროპის საშინაო მიგრაციისა და მოქალაქეობის საკითხებში, დიმიტრის ავრამოპულოსმა განაცხადა: “რომ არ ყოფილიყო საბჭოთა ოკუპაცია, საქართველო აუცილებლად იქნებოდა ევროკავშირის დამფუძნებელ მამათა შორის”. ეს განცხადება მართლაც ძალიან მნიშვნელოვანია. გუშინდელმა დღემ კიდევ ერთხელ წარმოაჩინა საქართველოს ევროპული, დემოკრატიული ტრადიციების და ფასეულობების მნიშვნელობა მთელი მსოფლიოს მასშტაბით. ჩვენ ამაზე უფრო მეტი უნდა ვისაუბროთ. უფრო მეტი უნდა ვისაუბროთ იმ სამი წლის განმავლობაში გაკეთებულ ტიტანურ საქმეზე, ვიდრე ჩვენ ამას აქამდე ვაკეთებდით. ვფიქრობ, ეს საქართველოსთვის ძალიან მნიშვნლოვანია. თუ გნებავთ, ეს ჩემი მხრიდანაც იმის აღიარებაა, რომ უფრო მეტი მნიშვნელობა უნდა მიენიჭოს ჩვენი ისტორიის ამ ძალიან მნიშვნელოვან სამწლიან მონაკვეთს“, – განაცხადა კვირიკაშვილმა.