“ნიკა გვარამია არის ის ადამიანი, რომელიც ფუთავდა 7 ნოემბრის საქმეს და გირგვლიანის მკვლელობას მაშინდელი ხელისუფლებისთვის“

გვარამია პირდაპირ მოუწოდებს ადამიანებს, ერთგვარი აჯანყებისკენ. ეს არის ნიკა გვარამიას დღევანდელი პოზიცია, – ამის შესახებ საქართველოს პარლამენტის თავმჯდომარე ირაკლი კობახიძემ ხორავას ქუჩაზე მომხდარი მკვლელობის საქმეზე, საპარლამენტო კომისიის შექმნის საკითხზე განაცხადა.
კობახიძე აღნიშნულ საკითხზე ოპოზიციის შეფასებებს გამოეხმაურა.
„დღეს ჩვენ მოვისმინეთ ოპოზიციის გამოსვლები კომისიასთან დაკავშირებით, ჯერ ბიუროს სხდომაზე, სადაც როგორც „ევროპული საქართველოს“, ისე „ნაციონალური მოძრაობის“ წარმომადგენლებმა აღნიშნეს, რომ აუცილებელი იყო კომისიის შექმნა. თუმცა, უკვე ვხედავთ განსხვავებულ რიტორიკას მას შემდეგ, რაც უმრავლესობამ დააფიქსირა საკუთარი პოზიცია კომისიასთან დაკავშირებით. ამ ახალ პოზიციას წინ უსწრებდა „ნაციონალური მოძრაობის“ ერთ-ერთი ლიდერის, ნიკა გვარამიას განცხადება, რომელიც საზოგადოებას რადიკალიზმისკენ მოუწოდებს და რომელმაც ერთგვარი უნდობლობა გამოუცხადა საპარლამენტო კომისიას, რომელიც ჯერ არცაა შექმნილი. ამას შემდეგ მოჰყვა „ნაციონალური მოძრაობისა“ და „ევროპული საქართველოს“ განცხადებები. ისინი თავად იყვნენ ამ საკითხის ინიციატორები. დღეს ისინი უკვე საუბრობენ, რომ მათი გადმოსახედიდან გაუგებარია რისთვის იქმნება ეს კონკრეტული კომისია“, – განაცხადა ირაკლი კობახიძემ.
მისი შეფასებით, პროცესების უკან პოლიტიკური ინტერესი აშკარად ჩანს.
„ვინ არის ამ პროცესების ლიდერი – ეს ძალიან იკვეთება. მე უკვე ვახსენე ნიკა გვარამია. დღეს წავიკითხეთ მისი კიდევ ერთი განცხადება კომისიის შექმნასთან დაკავშირებით. მან, „ნაციონალური მოძრაობის“ ერთ-ერთმა ლიდერმა, უნდობლობა გამოუცხადა ამ კომისიას, რასაც შემდეგ მოჰყვა რომან გოცირიძის განცხადება. გვარამია პირდაპირ მოუწოდებს ადამიანებს, ერთგვარი აჯანყებისკენ. ეს არის ნიკა გვარამიას დღევანდელი პოზიცია. მე შეგახსენებთ, ვინ არის ნიკა გვარამია. ნიკა გვარამია არის ის ადამიანი, რომელიც კონკრეტულად ფუთავდა შვიდი ნოემბრის საქმეს და კონკრეტულად ფუთავდა გირგვლიანის მკვლელობას მაშინდელი ხელისუფლებისთვის. ეს არის „ნაციონალური მოძრაობის“ ერთ-ერთი უბინძურესი ლიდერი, რომელიც პირდაპირ პასუხისმგებელია „ნაციონალური მოძრაობის“ მიერ ჩადენილ სისხლიან დანაშაულებზე. ეს ადამიანი, „ნაციონალური მოძრაობის“ სხვა წარმომადგენლები, „რუსთავი 2“ პირდაპირ ჩანს, როგორც „ნაციონალური მოძრაობის“ პიარ-მანქანა. ქალბატონი ნანა ჟორჟოლიანი იყო ერთ-ერთი სახე, რომელიც წარმოდგენილი იყო „ნაციონალური მოძრაობის“ სახელით ამ აქციებზე, ისინი პოლიტიკურად ერთვებიან ამ პროცესში და პირდაპირ იკვეთება პოლიტიკური ინტერესის ნიშნები, პოლიტიკური სპეკულირების ნიშნები“, – განაცხადა ირაკლი კობახიძემ.