ფრაქცია „ქართული ოცნების“ თავმჯდომარე, დროებითი საგამოძიებო კომისიის წევრი მამუკა მდინარაძე, ხორავას ქუჩაზე მოკლული დავით სარალიძის მამის, ზაზა სარალიძის განცხადებას გამოეხმაურა, რომლის მიხედვითაც, მან ეკა ბესელიას უნდობლობა გამოუცხადა.
როგორც მდინარაძემ განმარტა, კომისიაში “ქართული ოცნება” უმცირესობის სახითაა წარმოდგენილი, ამიტომ მათი ვერცერთი ხმა ვერ იქნება გადამწყვეტი.
“გადამწყვეტი არცერთი ხმა არ იქნება უმრავლესობის, იმიტომ რომ 17-კაციან შემადგენლობაში “ქართული ოცნების” მხოლოდ 6 დეპუტატია. აქედან გამომდინარე, კონკრეტულ ადამიანებზე ყურადღების გამახვილება არაფერს მოგვცემს. გარდა ამისა, ეკა ბესელია არის იურიდიულ საკითხთა კომიტეტის თავმჯდომარე და აგრეთვე, არის სისხლის სამართლის სპეციალისტი. ამიტომაც, ის შევიდა კომისიის შემადგენლობაში და დიდი გამოცდილება აქვს ამ მიმართულებაში. შესაბამისად, ეს არ მგონია, რომ აქტუალური საკითხი უნდა იყოს”, – განაცხადა მამუკა მდინარაძემ.
შეგახსენებთ, რომ ზაზა სარალიძე დროებითი საგამოძიებო კომისიის ერთ-ერთი წევრის, ეკა ბესელიას აცილებას ითხოვს. მოკლული მოზარდის მამა აცხადებს, რომ საგამოძიებო კომისიაში, ეკა ბესელიას გარდა, ყველას ენდობა.