მამუკა მდინარაძე – ქვეყანაში არ არსებობენ ხელშეუხებელი ადამიანები

საპარლამენტო უმრავლესობის წევრი მამუკა მდინარაძე აცხადებს, რომ სახელმწიფო თავისი ქმედებით და თითოეული ნაბიჯით ადასტურებს, რომ ქვეყანაში არ არსებობენ ხელშეუხებელი ადამიანები. ჟურნალისტებთან საუბარში მდინარაძემ განაცხადა, რომ როდესაც შესაბამისი მტკიცებულებები იქნა მოძიებული და შეიქმნა საიმისო პირობები, რომ კონკრეტულ ადამიანს წარედგინოს ბრალი, სწორედ მაშინ მოხდა ამის გაკეთება შინაგან საქმეთა სამინისტროს მიერ.
„ჩვენ ინტერნსიური კონტაქტი გვაქვს შინაგან საქმეთა სამინისტროსთან და მის ხელმძღვანელებთან. როგორც აღმოჩნდა, ერთ-ერთმა ბრალდებულმა ბოლო სხდომამდე სამი დღით ადრე მისცა გამოძიებას ჩვენება, შემდეგ ამ ჩვენების საფუძველზე დაიკითხნენ სხვა ადამიანებიც და შესაბამისად, ამის შემდეგ შეგროვებული მტკიცებულებების საფუძველზე, დაკავებული იქნა მირზა სუბელიანი“, – განაცხადა მამუკა მდინარაძემ.
შსს-მ მირზა სუბელიანი ხორავას ქუჩაზე მომხდარი მკვლელობის შეუტყობინებლობისთვის სისხლის სამართლის კოდექსის 376-ე მუხლით გუშინ დააკავა.