შინაგან საქმეთა მინისტრი გიორგი მღებრიშვილი აშშ-ს ჯორჯიის შტატის გამოძიების ბიუროს ხელმძღვანელს, ვერნან ქანანს შეხვდა.
შეხვედრას ჯორჯიის შტატის საზოგადოებრივი უსაფრთხოების სასწავლო ცენტრის პროფესორი დეილ მენი, სახელმწიფო ანტინარკოტიკული და სამართალდამცავ ორგანოებთან ურთიერთობის საერთაშორისო ბიუროს (INL) პროგრამის კოორდინატორები და საქართველოში აშშ-ს საელჩოს წარმომადგენლები ესწრებოდნენ.
როგორც უწყების პრესსამსახურში აცხადებენ, მხარეებმა ორ ქვეყნას შორის სამართლდამცავ სფეროში არსებული თანამშრომლობის ფარგლებში მიღწეული პროგრესი და სამომავლო გეგმები განიხილეს.
გიორგი მღებრიშვილმა აშშ-ს სახელმწიფო დეპარტამენტსა და INL-ს მრავალწლიანი თანამშრომლობის შედეგად განხორციელებული წარმატებული პროექტებისთვის, ასევე, საქართველოს ევროატლანტიკური ინტეგრაციის კუთხით გატარებული რეფორმების პროცესში დახმარებისთვის მადლობა გადაუხადა.
გიორგი მღებრიშვილმა ყურადღება გაამახვილა იმ მნიშვნელოვან პროექტებზე, რომლებიც საქართველოს შს სამინისტროში აშშ–ს მხარდაჭერით ხორციელდება, მათ შორისაა, საზღვრის უსაფრთხოების უზრუნველყოფა და საპატრულო პოლიციის ტექნიკური აღჭურვა.
შეხვედრაზე შს მინისტრმა შსს-ს აკადემიის რეგიონულ ცენტრად ჩამოყალიბების პროექტის შესახებაც ისაუბრა, რომლის განხორციელებაც უახლოეს მომავალში აშშ-ს სახელმწიფო დეპარტამენტის მხარდაჭერით დაიწყება.
სამინისტროს პრესსამსახურის მტკიცებით, აშშ-ს დელეგაციის წევრებმა გიორგი მღებრიშვილს შს სამინისტროში მიმდინარე და დეგეგმილი რეფორმების განხორციელებაში სრული მხარადაჭერა გამოუცხადეს.
”ჩვენ ერთიანი საპოლიციო საზოგადოების წარმომადგენლები ვართ, ერთნაირი პრობლემებით. ამიტომ გამოცდილების გაზიარებას და პარტნიორობას დიდი მნიშვნელობა აქვს“, – განაცხადა შს მინისტრთან საუბრისას აშშ-ს ჯორჯიის შტატის გამოძიების ბიუროს ხელმძღვანელმა და გიორგი მღებრიშვილი კალიფორნიაში, სან დიეგოში, პოლიციის ხელმძღვანელ პირთა საერთაშორისო ასოციაციის კონფერენციაზე მიიწვია, რომელიც მიმდინარე წლის ოქტომბერშია დაგეგმილი.
აღსანიშნავია, რომ ამერიკულმა მხარემ საქართველოს შს მინისტრს ასოციაციაში გაწევრიანება ოფიციალურად შესთავაზა.
გიორგი მღებრიშვილმა მიწვევისა და შეთავაზებისთვის ამერიკელ კოლეგებს მადლობა გადაუხადა.