მაგდა პაპიძე ყველა გარემოების გათვალისწინებით, საშიში იყო საზოგადოებისთვის, – ამის შესახებ მაგდა პაპიძის საქმის პროკურორმა დავით ნეფარიძემ სასჯელის დანიშვნის სხდომის დასრულების შემდეგ განაცხადა.
მისი თქმით, ბრალდებულმა გადალახა ყველაზე დიდი ზღვარი, რომელიც შეიძლება არსებობდეს ადამიანის ცხოვრებაში და საკუთარი შვილი მოკლა, ის ნამდვილად იყო საზოგადოებისთვის საშიში.
”ის მოტივი და მიზანი, რაც დანაშაულის ჩადენას ედო საფუძვლად, ასევე დანაშაულის ჩადენის ხერხი და საშუალება, გამოვლენილი მართლსაწინააღმდეგო ქმედებები, ასევე ბრალდებულის პიროვნება, რომელმაც გადალახა ყველაზე დიდი ზღვარი, რაც შეიძლება არსებობდეს ადამიანის ცხოვრებაში – დედაშვილური სიყვარული და საკუთარი შვილი მოკლა. ყველა ამ გარემოების გათვალისწინებით, ეს ადამიანი, მართლაც, საშიში იყო საზოგადოებისთვის და იმისთვის, რომ მიღწეული ყოფილიყო სასჯელის მიზნები, ბრალდების მხარემ იშუამდგომლა სასამართლოს წინაშე, რათა ბრალდებულის მიმართ გამოტანილი ყოფილიყო უვადო თავისუფლების აღკვეთა. სასამართლომ გაიზიარა ბრალდების მხარის აღნიშნული პოზიცია, რომელიც ემთხვეოდა დაზარალებულის უფლებამონაცლის პოზიციას და მსჯავრდებულს უვადოდ თავისუფლების აღკვეთა მიუსაჯა”, – განაცხადა დავით ნეფარიძემ.
პროკურორმა ასევე განმარტა, რომ დაცვის მხარეს აქვს სასჯელის საკასაციო წესით სააპელაციო სასამართლოში ერთჯერადად გასაჩივრების უფლება, თუმცა მისთვის უცნობია, გამოიყენებს თუ არა ის ამ უფლებას.