საქართველოს ფეხბურთის ფედერაციის ძალისხმევით ქართველი მწვრთნელები სხვადასხვა კლუბებში კვალიფიკაციას იმაღლებენ. რა თქმა უნდა, ეს საშური საქმეა. ლადო ბურდული ახლახან დაბრუნდა უკრაინიდან, სადაც ლუგანსკის “ზორიაში”, ორ ქართველ სპეციალისტთან ერთად, სტაჟირებას გადიოდა…
მოგეხსენებათ, “ზორია” ბურდულის ყოფილი კლუბია. ამ გუნდში მას კარგი პერიოდი ჰქონდა და ერთ-ერთი ლიდერიც გახლდათ. “ლელომ” მისგან ბევრი საინტერესო რამ მოისმინა…
სკრიპნიკისგან ყველამ ბევრი ვისწავლეთ…
– იცით ყველამ, ქართველი მწვრთნელები პროლიცენზიის კურსს გავდივართ. აქედან გამომდინარე, ხშირად გვაქვს მივლინება სხვადასხვა კლუბში. ამჯერად იყო შემოთავაზება, ჩვენი კავშირებით მოგვეძებნა ისეთი კლუბი, სადაც საშუალება გვექნებოდა, თამაშისთვის მზადების მთელი ციკლის განმავლობაში ჩართულები ვყოფილიყავით ამ კლუბის ყოველდღიურ ცხოვრებაში…
დავიყავით ჯგუფებად. რა თქმა უნდა, ასეთ დროს შედარებით უკეთესია, წახვიდე ისეთ კლუბში, რომელიც ჩემპიონთა ლიგაში თამაშობს და გრანდია, მაგრამ ასეთი გუნდების მწვრთნელები მაინც ერიდებიან ბოლომდე თავიანთი სათამაშო ფილოსოფიის გამხელას. კი, შეიძლება გამოძებნო კავშირები, გააგზავნო “მეილი” და ძალიან თავაზიანადაც მიგიღებენ, მაგრამ… ასე ვთქვათ, ახლოს არ მიგიშვებენ, საქმეში ბოლომდე არ ჩაგახედებენ…
გადავწყვიტეთ, არჩევანი გაგვეკეთებინა ლუგანსკის “ზორიაზე”. ეს არის ჩემი ყოფილი კლუბი და მასთან ძალიან თბილი მოგონებები მაკავშირებს. ჩემ გარდა, ჯგუფში იყო საჩხერის “ჩიხურას” ორი მწვრთნელი: ვახტანგ თურმანიძე და ლადო ზამბახიძე…
“ზორია” ბოლო წლებში ძალიან წარმატებული კლუბია. უკანასკნელი 5 სეზონიდან ოთხ შემთხვევაში ითამაშა ევროპალიგის ჯგუფში და მხოლოდ წლეულს ვერ შეძლო ეს. “ზორია” ბოლო საკვალიფიკაციო ეტაპზე “ესპანიოლს” გადაეყარა და დამარცხდა. “ესპანიოლის” სიძლიერეზე სიტყვას აღარ გავაგრძელებ, ბოლოს და ბოლოს, პრიმერა დივიზიონის კლუბია…
“ზორიაში”, ამ სიტყვის პირდაპირი მნიშვნელობით, თან გადაგვყვნენ. გვემსახურებოდა მანქანა, ვარჯიშებამდე კარგა ხნით ადრე მივდიოდით ბაზაზე და, შემიძლია ვთქვა, რომ სავარჯიშო პროცესის სრულფასოვანი მონაწილეები ვიყავით.
საინტერესოა, რომ გუნდის უფროსი საქართველოში დაბადებულ-გაზრდილი აგანოვია. მას სახლიც აქვს საქართველოში და ძალიან ხშირადაც ჩამოდის, ძალიან უყვარს ქართველები…
ცალკე მინდა გითხრათ “ზორიას” მთავარ მწვრთნელ ვიქტორ სკრიპნიკზე. ეს არის ძალიან კარგი ადამიანი და, ამავე დროს, თავისი საქმის ნამდვილი პროფესიონალი. თავის დროზე, ის უკრაინის ნაკრების ფეხბურთელი იყო და ჯერ სამშობლოში ითამაშა, მერე – ბრემენის “ვერდერში” ასპარეზობდა წლების განმავლობაში…
მას შემდეგ, რაც საფეხბურთო კარიერა დაასრულა, მწვრთნელობა დაიწყო. ის გახლდათ თომას შააფის ასისტენტი მაშინ, როცა “ვერდერი” გახდა გერმანიის ჩემპიონი. მერე თავადაც წვრთნიდა “ვერდერს”. გერმანიაში ცხოვრობს და დაუძახეს, შესთავაზეს, “ზორია” ჩაებარებინა, რაზეც უარი არ თქვა.
უკრაინაში ყველა ერთხმად აღიარებს, რომ სკრიპნიკის მუშაობა განსაკუთრებულია. ჩვენც დავრწმუნდით, რომ მას თავისებური მიდგომა აქვს ფეხბურთელების მიმართ. არავითარი ყვირილი და ხმის აწევა. პირიქით, ფეხბურთელებთან მეგობრული ურთიერთობა აქვს, მაგრამ, ამავე დროს, ძალიან მომთხოვნიცაა.
მისგან და, ზოგადად, უკრაინაში გატარებული დროისგან ძალიან ბევრი ვისწავლე. მაგალითად, სკრიპნიკი უპირატესობას ანიჭებს 4-4-2 ტაქტიკურ სქემას. ამავე დროს, შუაში თამაშობს რომბით. ჩვენ ეს ყველაფერი ძალიან ახლოს ვნახეთ, ასე ვთქვათ – ჩავიხედეთ ბოლომდე ამ სამზარეულოში.
ეს მაგალითი უნდა იყოს ქართული კლუბებისათვის…
– მოგეხსენებათ, ამ დროისთვის ლუგანსკში ომია. აქედან გამომდინარე, გუნდი მოკლებულია საკუთარ მოედანზე თამაშის სიამოვნებას. “ზორიას” ხელმძღვანელობას ნაქირავები აქვს ზაპოროჟიეს საფეხბურთო ბაზა. კლუბის პრეზიდენტი ლუგანსკის ერთ-ერთი დიდი ქარხნის მეპატრონეა. ყველასთვის გასაგები მიზეზების გამო ეს ქარხანა ახლა არ მუშაობს…
იოლი ასახსნელია, რატომ შემცირდა ასე უკრაინაში ქართველი ფეხბურთელების რაოდენობა. რა თქმა უნდა, ყველაფერში დამნაშავე ომია. ზოგადად, უკრაინული კლუბების ფინანსური მდგომარეობაც აღარ არის იდეალური და “ზორია” ამის ნათელი მაგალითია.
ფეხბურთში მუდმივად იზრდება ანაზღაურება. “ზორიაში” კი მეტს იხდიდნენ მაშინ, როცა მე ამ კლუბში ვთამაშობდი. სადღეისოდ, საშუალო ხელფასი 7-8 ათასია. ყველაზე დიდი ხელფასი არის 15 ათასი…
“ზორია” სისტემატურად თამაშობს ევროპალიგის ჯგუფურ ეტაპზე და ეს ხდება კარგი მენეჯმენტის გამო. გუნდს არ აქვს იმის ფუფუნება, რომ თანხა დახარჯოს ფეხბურთელებზე და ძირითადად აჰყავს თავისუფალი აგენტები. მერე ეს მოთამაშეები უმატებენ და გაცილებით მდიდარ კლუბებში იყიდებიან სოლიდურ ფასად. ვფიქრობ, ეს კარგი მაგალითი უნდა იყოს ქართული კლუბებისთვის.
ჩვენს იქ ყოფნაში გუნდი ემზადებოდა პოლტავის “ვორსკლასთან” სათამაშოდ. მზადება მიდიოდა ძალიან სერიოზულად – მეტოქეზე უმცირესი ნიუანსებიც კი განიხილეს. თამაში “ზორიამ” დამაჯერებლად მოიგო.
სხვათა შორის, ქართველ მწვრთნელთა ერთი ჯგუფი დონეცკის “შახტარში” იყო მივლინებული. როცა “შახტარის” პორტუგალიელი მწვრთნელისთვის უკითხავთ “ზორიას” თაობაზე, მას ასე უთქვამს – უკრაინის ჩემპიონატში ერთადერთი გუნდია, რომელიც ნამდვილ ფეხბურთს გვეთამაშებაო…
ვაისმა უნდა ნახოს ყველა ფეხბურთელი…
– კარს მოგვადგა ორი სანაკრებო მატჩი. რა თქმა უნდა, მოედანზე წასაგებად არავინ გადის და საქართველოს ნაკრებსაც ბოლომდე თამაში და ბრძოლა მოეთხოვება, მაგრამ ჩვენთვის მთავარი მაინც ის არის, დავინახოთ – რა არის გამოსასწორებელი ერთა ლიგის პლეი ოფებამდე. ვაისმა უნდა ნახოს ყველა ფეხბურთელის შესაძლებლობა. ჩვენ ვხედავთ, რომ ის მიმართავს გარკვეულ როტაციას და ესეც სრულიად ბუნებრივია…
http://lelo.ge/