შაქარაშვილის საქმეზე ერთ-ერთი დაკავებულის ადვოკატი ამბობს, რომ პროკურატურაში შეცდომით გადასცეს პირადი ცხოვრების ამსახველი მასალები, რომელიც პორნოგრაფიული ხასიათისაა და რომელშიც საქმის მონაწილე პირის მეგობარი ფიგურირებს.
როგორც ადვოკატი ვასილ მამულაშვილი ამბობს, სამართალდამცველებმა მას საქმის მასალებთან ერთად, შეცდომით გადასცეს დაბადების დღეზე მყოფი პირების პირადი ცხოვრების ამსახველი ფოტო და ვიდეო მასალა. მისივე ინფორმაციით, საგამოძიებო უწყებაში გუშინვე დაიბარეს და ხელწერილის დაწერა მოსთხოვეს, რათა მასალა არ გავრცლებულიყო.
ვასილ მამულაშვილი ფორმულასთან საუბარში განმარტავს, რომ ამ ხელწერილზე ხელი არ მოაწერა, ვინაიდან მათი მხრიდან არ არის საშიშროება, რომ აღნიშნული მასალა გასაჯაროვდეს.
„იყო ერთგვარი პორნოგრაფიული ხასიათის, რომელშიც ფიგურირებდა ახალგაზრდა გოგო, რომელიც სავარაუდოდ იყო ერთ-ერთი მონაწილე პირის მეგობარი. ჩვენ გუშინ ღამის 11 საათზე, გასაუბრების მიზნით დაგვიკავშირდა პოლიცია.
სამართალდამცავები ითხოვდნენ, რომ თითქოსდა დაცვის მხარეს გაფრთხილების ხელწერილი უნდა დაეწერა. მათ შორის გულისხმობდა ამ ინფორმაციის შენახვა-გავრცელებასთან დაკავშირებით, სისხლის სამართლებრივი პასუხისმგებლობის გაფრთხილებასთან დაკავშირებით.
განვუმარტეთ, რომ ასეთი სახის გაფრთხილება არასწორი იყო – მათივე მოქმედებით მოხვდა კადრები ჩვენს კომპიუტერში. არანაირ გაფრთხილებას ხელი არ მოვაწერეთ და უკვე ჩვენ მოვითხოვეთ მათ მიერ გადმოცემული მტკიცებულებების განადგურება. ველოდებით, რომ საგამოძიებო ორგანო ამ ვიდეომასალის განადგურებასთან დაკავშირებით დაგვიკავშირდება“, – განაცხადა ადვოკატმა ვახო მამულაშვილმა.
ცნობისთვის, 19 წლის ფეხბურთელის გარდაცვალების საქმეზე, შსს-მ ჯგუფური ძალადობის ორგანიზების, მასში მონაწილეობის, თავისუფლების უკანონო აღკვეთისა და ორი ან მეტი პირის მიმართ ჯგუფური ძალადობის ბრალდებით, 26 ივნისს 17 ადამიანი დააკავა.
მცხეთის რაიონულმა სასამართლომ 17-ვე ბრალდებულს აღკვეთის ღონისძიების სახით პატიმრობა შეუფარდა.