შავ ზღვაზე მაშველებმა დილით ცოლი, საღამოს კი ქმარი გადაარჩინეს, – ინფორმაციას ამის შესახებ „გურია თუდეი“ ავრცელებს.
მაშველების თქმით, შემთხვევა მაშინ მოხდა, როცა ზღვაზე დიდი შტორმი იყო.
„გავაფრთხილეთ ადამიანები, რომ ზღვაში არ შესულიყვნენ, მაგრამ როგორც უმეტეს შემთხვევაში ხდება, არ დაგვიჯერეს. როდესაც შტორმის გამო ზღვაში შესაბამისი ფერის ალმები აღვმართეთ, მოქალაქეებმა დახმარებისთვის მაშინ მოგვმართეს.
ახალგაზრდა ქალი შველას ითხოვდა. მაშინვე გავეშურეთ შემთხვევის ადგილზე და მოქალაქე სამშვიდობოს გამოვიყვანეთ. საღამოსაც ძლიერი ღელვა იყო და კიდევ ერთხელ დასჭირდათ ჩვენი დახმარება. ამჯერად მამაკაცი ითხოვდა შველას.
ალბათ, ნახევარი წუთი რომ დაგვგვიანებოდა, ვინ იცის, რა მოხდებოდა. შემდეგ გავიგეთ, რომ დილით გადარჩენილი ქალბატონი და საღამოს გადარჩენილი მამაკაცი ცოლ-ქმარი ყოფილან.
ბავშვი ჰყოლიათ მაგნიტური ქვიშის სამკურნალო თვისებების გამო ჩამოყვანილი და მათ თავს ლამის ტრაგედია დატრიალდა.
შემთხვევიდან ორი დღის შემდეგ, მოულოდნელად სამაშველო კოშკურასთან ეს ცოლ-ქმარი გვესტუმრა, ფოთელები აღმოჩნდნენ, მადლიერების ნიშნად ტორტი წარწერით „მაშველი გიშველის“ და სხვადასხვა სახის ნუგბარი მოგვიტანეს.” – უთხრა საინფორმაციო სააგენტოს დავით პატარაიამ.