ჩვენ მზად ვართ, არა მხოლოდ პარტია „მოქალაქეებთან“, არამედ ნებისმიერ პარტიასთან ვაწარმოოთ შეხვედრები ნებისმიერ ფორმატში და ავიღოთ პასუხისმგებლობა ნებისმიერ დეტალზე, რაზედაც ჩვენ დახურულ თუ ღია შეხვედრებზე ვსაუბრობდით, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.
„მზად ვართ, ჩავატაროთ საარჩევნო რეფორმა იმ დეტალების მითითებით, რაზეც ოპოზიციასთან შეხვედრებზე ვსაუბრობდით. პრაქტიკულად, ამაზე შეთანხმება მიღწეულია. მზად ვართ, დავსხდეთ მოლაპარაკების მაგიდასთან ყველა პარტიასთან, რომელიც კონსტრუქციულობას გამოიჩენს. მაგალითად, რამდენიმე დღის წინ ირაკლი კობახიძემ სთხოვა ცესკოს, დაიწყონ მზადება ელექტრონულ მოწყობილობებთან დაკავშირებით, ვინაიდან შემდეგ რომ მივაღწიოთ სამართლებრივ შეთანხმებას, შეიძლება არჩევნებამდე ამის გაკეთება ვერ მოესწროს“, – განაცხადა მდინარაძემ.