სააკაშვილი ბოლო მცდელობას მიმართავს და მასობრივი არეულობის მოწყობის იმედით საქართველოში ჩამოსვლის კონკრეტულ თარიღსაც კი ასახელებს. ვინაიდან 2 ოქტომბრის არჩევნები პრაქტიკულად რევოლუციური სიტუაციის შექმნის ბოლო შანსია, გამორიცხულიც არ არის, რომ სააკაშვილმა მართლაც გადადგას ეს სასოწარკვეთილი ნაბიჯი. გვინდა, ვიცოდეთ რამდენად არის მზად საქართველოს ხელისუფლება, ოპოზიციის რევოლუციური სცენარისთვის, რომელიც გეგმაზომიერი წინასაარჩევნო კამპანიით არის დაკავებული, – ამის შესახებ ნანა კაკაბაძე სოციალურ ქსელში წერს, რომლის განცხადებას არასამთავრობო ორგანიზაცია „ყოფილი პოლიტპატიმრები ადამიანის უფლებებისთვის“ აქვეყნებს.
კაკაბაძის თქმით, ოპოზიციის ყველა რესურსი მიმართულია იქითკენ, რომ მმართველი პარტიის მიერ 43 ან მეტი პროცენტის მიღების შემთხვევაში არჩევნები წინასწარ გაყალბებულად გამოაცხადოს.
„2021 წლის 2 ოქტომბრის მუნიციპალური არჩევნები საქართველოს ოპოზიციური პარტიების მიერ წარმოჩენილია რეფერენდუმად, რომლის დროსაც თითქოს, უნდა გადაწყდეს ქვეყნის ხელისუფლების შეცვლის საკითხი. ისინი საკუთარი ამომრჩევლების მობილიზაციის მიზნით აქცენტს აკეთებენ არა კონკრეტულ დაპირებებზე, მუნიციპალიტეტებში არჩევის შემთხვევაში, არამედ იმაზე, რომ სახელისუფლო პარტიის მიერ ხმების 43%-ზე ნაკლების მიღების შემთხვევაში რევოლუციური სცენარით (საპროტესტო გამოსვლებით და საერთაშორისო ზეწოლით) აიძულებენ ხელისუფლებას ვადამდელი საპარლამენტო არჩევნების დანიშვნას, სადაც ერთად აღებული ყველა ოპოზიციური ძალა ხელისუფლებაზე მეტ ხმას აიღებს, შექმნის კოალიციურ მთავრობასა და ეს იქნება ქართველი ხალხისთვის სიმდიდრის, დემოკრატიისა და ბედნიერების მომტანი ეპოქის დასაწყისი.
ჩვენ აქ არაფერს ვამბობთ იმაზე, თუ როგორ შეიძლება გაიყოს ძალაუფლება 10-12 პარტიისგან შემდგარმა დღევანდელმა ოპოზიციურმა სპექტრმა და როგორ მოუტანოს ასეთმა კონგლომერატმა ქვეყანას მშვიდობა და წინსვლა. უბრალოდ, ვაჩვენებთ, თუ როგორ მოქმედებენ ისინი თავიანთი მიზნის მისაღწევად.
ზემოხსენებული მიზეზის გამო წინასაარჩევნო კამპანიას ოპოზიცია პრაქტიკულად არ აწარმოებს. თავისი მიზნების შესაბამისად, ოპოზიციის ყველა რესურსი მიმართულია იქითკენ, რომ მმართველი პარტიის მიერ 43 ან მეტი პროცენტის მიღების შემთხვევაში არჩევნები წინასწარ გამოაცხადოს გაყალბებულად, ხელისუფლება ძალადობრივად მიტაცებულად და შექმნან იდეოლოგიური ბაზა იმისათვის, რომ ძალადობრივად მიტაცებული ხელისუფლების მიმტაცებლისთვის უკან გამოტაცება ხალხის მიერ სავსებით კანონიერი და ლეგიტიმური ქმედებაა.
ამ მიზნის მისაღწევად საქმეში ჩართულია ყველა რესურსი – ფინანსური, იდეოლოგიური, ძალადობრივი. წინა პლანზეა გამოსული „ნაცმოძრაობისა“ და მისი სატელიტი პარტიების იდეოლოგიური ფრონტის მუშაკები, რომლებიც ფორმალურად გაფორმებულები არიან სხვადასხვა ოპოზიციურ ტელევიზიაში, თუმცა, რეალურად წარმოადგენენ ტერორისტულ-ძალადობრივი ფრონტის მეწინავე რაზმს.
სწორედ ჟურნალისტებად წოდებული ეს მოძალადე პარტ-აქტივისტები ცდილობენ ლეგიტიმაცია შესძინონ სიძულვილის ენით მოსაუბრე საკუთარ პარტიულ ლიდერებისა და მათ ძალადობრივ მოწოდებებს. ამ ზონდერ-ჟურნალისტების მხრიდან „გაპრავებას“ ექვემდებარება ოპოზიციის ყველა ძალადობრივი მოწოდება და ქმედება – დაწყებული პოლიციელებზე მუქარიდან („თავს გაგიხეთქავ“), მათთვის წითელი საღებავების შესხმისა და მათზე უშუალოდ განხორციელებული ფიზიკური ძალადობიდან, დამთავრებული სახლებში შეჭრით თუ ხელისუფლების ოჯახის წევრი არასრულწლოვანების ბულინგით. საქმე იქამდეც კი მიდის, რომ ოპოზიციამ ლამის მეგის ქარდავას გათეთრება და მისი პოლიტპატიმრად გამოცხადებაც კი დაიწყო.
დაინახა რა, რომ ამ ყველაფერს რეალური შედეგი მაინც არ მოაქვს და ხალხის მასობრივ მხარდაჭერას ვერ პოულობს, მათი ბელადი სააკაშვილი ბოლო მცდელობას მიმართავს და მასობრივი არეულობის მოწყობის იმედით საქართველოში ჩამოსვლის კონკრეტულ თარიღსაც კი ასახელებს. ვინაიდან 2 ოქტომბრის არჩევნები პრაქტიკულად რევოლუციური სიტუაციის შექმნის ბოლო შანსია, გამორიცხულიც არ არის, რომ სააკაშვილმა მართლაც გადადგას ეს სასოწარკვეთილი ნაბიჯი. გვინდა, ვიცოდეთ რამდენად არის მზად საქართველოს ხელისუფლება, ოპოზიციის რევოლუციური სცენარისთვის, რომელიც გეგმაზომიერი წინასაარჩევნო კამპანიით არის დაკავებული. მიგვაჩნია, რომ თუ ხელისუფლება მხოლოდ კლასიკური წინასაარჩევნო კამპანიის წარმოებით დაკავდება და აღნიშნულ საფრთხეებს სათანადო ყურადღებას არ მიაქცევს, შეიძლება ეს ყველაფერი ქვეყნისა და ხალხისთვის კიდევ ერთხელ მძიმე შედეგით დასრულდეს და დემოკრატიული ფრაზეოლოგიით შეფუთული დიქტატურის დაბრუნების საშიშროება რეალური აღმოჩნდეს.
ეს ყველაფერი ჩვენმა ხალხმა უკვე იწვნია 2003 წლის ე. წ. „ვარდების რევოლუციის“ შემდეგ, რომლის შედეგად მივიღეთ სისხლის მდინარეები, გაკულაკებული საზოგადოება, სისტემური წამებები და მკვლელობები ციხეებში თუ ქუჩებში, რუსეთისთვის გადაცემული სტრატეგიული ობიექტები და დაკარგული ტერიტორიები“, – წერს „ფეისბუქზე“ ნანა კაკაბაძე.