“2 ოქტომბრის არჩევნები, საბოლოო ჯამში, დასრულდება როგორც ადგილობრივი თვითმმართველობის არჩევნები და რეფერენდუმად ვერ გადაიქცევა”

2 ოქტომბრის არჩევნები, საბოლოო ჯამში, დასრულდება როგორც ადგილობრივი თვითმმართველობის არჩევნები და რეფერენდუმად ვერ გადაიქცევა, – აღნიშნულ შეფასებას პარლამენტის ოპოზიციონერი ვიცე-სპიკერი ლევან იოსელიანი აკეთებს.

იოსელიანის თქმით, ასეთი პრეცედენტი არასდროს ყოფილა და მაშინ, როცა ადამიანებს კონკრეტული პრობლემები აქვთ მოსაგვარებელი, აქცენტების ზოგად პოლიტიკურ თემებზე გაკეთება, არასწორია.

“თუ ბოლო სანდო კვლევებს გადახედავთ, ნახავთ, რომ ჩვენი თანამოქალაქეების ნახევარზე მეტი ვადამდელი არჩევნების ჩატარების თაობაზე მოსაზრებას არ იზიარებს. ამომრჩეველთა უმრავლესობას ცვლილებები სურს და უნდა, რომ ეს ცვლილება მათ ყოველდღიური ცხოვრების ხარისხზე აისახოს. ეს არის ადგილობრივ თვითმმართველობებში ოპოზიციის მნიშვნელოვანი წარმომადგენლობის ყოლა და თუ შესაძლებელი იქნება, ბევრ ქალაქში ოპოზიციის გამარჯვება და ამით არსებული პრობლემების უფრო სწრაფად და ეფექტურად მოგვარება. ეს არის ის, რაც ხალხს აინტერესებს და არა ის, რომ ეს ყველაფერი გვერდზე გადავდოთ და ვილაპარაკოთ ის, რაც მოსახლეობის ყოველდღიურობასთან კავშირში არ არის”, – განაცხადა ლევან იოსელიანმა.