ჩვენ თუ გვინდა სამართლებრივი სახელმწიფო, სადაც პირველ რიგში, კანონის უზენაესობაა დაცული და არცერთი ადამიანი არაა კანონზე მაღლა, მაშინ კითხვები არ უნდა გაგვიჩნდეს, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებს ნიკა გვარამიას საქმეზე საუბრისას განუცხადა.
მისი თქმით, გვარამიას საქმის პროცესი გამჭვირვალედ მიმდინარეობს, ისევე როგორც სხვა პატიმრების.
„ვერ შევალ დეტალებში და ვერ გავაკეთებ კომენტარს ბატონი გვარამიას შესახებ. ნებისმიერი ადამიანი, რომელიც კანონს დაარღვევს, ჩაიდენს დანაშაულს, უნდა დაისაჯოს. ასეთია მოწყობა ნებისმიერი სამართლებრივი, ცივილიზებული სახელმწიფოსი. ჩვენ თუ გვინდა, ვიყოთ თანამედროვე, ცივილიზებული დემოკრატია, სამართლებრივი სახელმწიფო, სადაც პირველ რიგში, კანონის უზენაესობაა დაცული და არცერთი ადამიანი არაა კანონზე მაღლა, მაშინ კითხვები არ უნდა გაგვიჩნდეს. მე სხვას ვერაფერს გეტყვით. პროცესი იმდენად გამჭვირვალედ წარიმართა, მე ამ შემთხვევაში არ ვსაუბრობ გვარამიაზე, ნებისმიერი პატიმრის, სხვა პატიმრებისაც, ეს არ არის ჩემი საზრუნავი. ამისთვის ჩვენ გვყავს პროკურატურა და სასამართლო, რომელიც ბოლო 8-9 წლის განმავლობაში ანგარიშვალდებული, გამჭვირვალე და ღია გახდა. უამრავი რეფორმა განხორციელდა და ჩვენ ევროკავშირის წევრი ქვეყნების მასშტაბით, საერთო სტატისტიკას თუ ავიღებთ, ბევრ ევროპულ ქვეყანასაც წინ ვუსწრებთ ყველა მიმართულებით“, – განაცხადა ღარიბაშვილმა.