მედიის წარმომადგენლები შეფასებისა და გამოცდების ეროვნული ცენტრის ხელმძღვანელ მაია მიმინოშვილთან ერთად, ერთ-ერთ საგამოცდო ცენტრში მიმდინარე მოსამზადებელ სამუშაოებს გაეცნენ. მაია მიმინოშვილმა განაცხადა, რომ წელს პირველად აბიტურიენტებს საშუალება ექნებათ, სურვილის შემთხვევაში გელის (ტუშის) საკუთარი კალამი შეიტანონ გამოცდაზე.
“მინდა ყველა აბიტურიენტს მივმართო, ყურადღებით წაიკითხონ საგამოცდო ბარათზე მითითებული ინფორმაცია. საგამოცდო ბარათზე მითითებულია რეგისტრაციის დაწყების დრო. პორობითად ვამბობ, თუ 09:00 საათზე იწყება გამოცდა, აბიტურიენტი აუცილებლად 08:00 საათზე უნდა გამოცხადდეს საგამოცდო ცენტრში. მინდა, აბიტურიენტებმა ყურადღება მიაქციონ და რამდენჯერმე წაიკითხონ საგამოცდო ბარათზე მითითებული ინფორმაცია. არის შემთხვევები, როდესაც საგამოცდო ცენტრი ან დრო ეშლება აბიტურიენტს.
22 საგამოცდო ცენტრიდან მხოლოდ ერთია განთავსებული ბათუმის უმაღლეს სასწავლებელში. დანარჩენი საგამოცდო ცენტრები ძირითადად, გარეუბნების სკოლებშია განლაგებული. გარეუბნების სკოლები შევარჩიეთ იმიტომ, რომ ეს შენობები გვაძლევენ შესაძლებლობას, მართლაც მშვიდ და წყნარ ვითარებაში ჩავატაროთ მთელი ეს პროცესი და აკმაყოფილებენ საგამოცდო ცენტრებისთვის აუცილებელ ძალიან ბევრ კრიტერიუმს. ყველა ამ შენობას აქვს დიდი და მაქსიმალურად გამწვანებული ეზო, რაც ასევე მნიშვნელოვანია ზაფხულის პერიოდში. აქედან გამომდინარე, რეგისტრაცია იწყება არა შენობიდან, არამედ ეზოს შემოსასვლელიდან,”- განაცხადა მიმინოშვილმა.
მისივე ინფორმაციით, აბიტურიენტმა გამოცდაზე თან უნდა იქონიოს საგამოცდო ბარათი, პირადობის მოწმობა, სურვილის შემთხვევაში საკუთარი გელიანი კალამი და წყალი.
წელს ეროვნულ გამოცდებზე 39000-მდე აბიტურიენტი გავა. გამოცდები 2 ივლისიდან დაიწყება.