“ეს დამოუკიდებელი საქართველოს ისტორიაში არასდროს არ ყოფილა”

”ქართული ოცნება” ”ევოლუციის გზით რევოლუციური ცვლილებების გახორციელებას აპირებს, – პარტიის გეგმებზე ”ქართული ოცნება-დემოკრატიული საქართველოს“ თავმჯდომარემ გიორგი კვირიკაშვილმა სენაკში , მაჟორიტარი დეპუტატობის კანდიდატის წარდგენისას ისაუბრა.
”ოთხი წლის განმავლობაში ჩვენ მივხედეთ ისეთ საბაზისო საკითხებს, როგორიცაა, მოსახლეობის ჯანმრთელობის დაცვა. აღარ არის საჭირო ქონების დაგირავება, მევახშისგან ვალის აღება იმისთვის, რომ ოჯახის წევრს თუნდაც ყველაზე ძვირადღირებული ოპერაცია გაუკეთო. ჩვენ ამ ოთხი წლის განმავლობაში დავიწყეთ მყარი საფუძვლის ჩაყრა ადგილობრივი წარმოების განვითარებისათვის. სოფლის მეურნეობას მიეხედა ისე, როგორც დამოუკიდებელი საქართველოს ისტორიაში არასდროს არ ყოფილა – მცირემიწიანი ფერმერების დახმარება, გრძელვადიანი პროგრამები, შეღავათიანი აგროკრედიტი, მრავალწლიანი ნარგავების გაშენება, სამაცივრე მეურნეობები, სასათბურე მეურნეობების განვითარება. ეს ყველაფერი დაწყებულია და არის იმის საფუძველი, რომ დღეს უკვე განახლებულ გუნდთან ერთად, ძველ თანამებრძოლებთან ერთად ქვეყანაში სწრაფი ცვლილება მოვიტანოთ, რათა მომავალი ოთხი წლის თავზე, საქართველოში, კეთილდღეობა ყველა ოჯახმა საკუთარ თავზე იგრძნოს”, – განაცხადა გიორგი კვირიკაშვილმა.