საქართველოს ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა 9 აპრილის მემორიალი ყვავილებით შეამკო და დაღუპულთა ხსოვნას პატივი მიაგო.
„მინდა უდიდესი მადლიერება გამოვხატო იმ ადამიანების მიმართ, რომლებმაც გაატარეს აქ 9 აპრილის ღამე და რომლებმაც სიცოცხლე შესწირეს ჩვენი ქვეყნის თავისუფლებას, ჩვენი ახალი სახელმწიფოს ჩამოყალიბებას, დამოუკიდებლობის დაბრუნებას. ეს დღე ყველასთვის ძალიან ტრაგიკულია და მეორე მხრივ, ძალიან მნიშვნელოვანი ქვეყნის ახალი ისტორიისთვის, მისი ახალი ეტაპისთვის. ყველას უნდა გვახსოვდეს, განსაკუთრებით ახალგაზრდა თაობას, რომ სწორედ ასეთი მოვლენების შედეგად, ასეთი ერთიანობის შედეგად არის შესაძლებელი ისტორიის შეცვლა, ჩვენთვის, ყველასთის ძვირფასი ფასეულობების დაცვა,“– განაცხადა ვიცე-პრემიერმა.
მაია ცქიტიშვილმა ხაზი გაუსვა 9 აპრილის მონაწილეთა ერთიანობის მნიშვნელობას და აღნიშნა, რომ 9 აპრილი არის დღე, რომელიც უნდა ახსოვდეს ყველას.
„თითოეულმა ჩვენგანმა უნდა გააკეთოს ყველაფერი, რათა ამ ადამიანების სიცოცხლეშეწირული ქვეყანა განვავითაროთ და ვეცადოთ ჩვენი ქვეყანა უფრო ძლიერი გავხადოთ,“- თქვა მან.
წელს 9 აპრილის მოვლენებიდან 30 წელი გავიდა. მშვიდობიანი აქცია, რომლის მთავარი მოთხოვნა საქართველოს დამოუკიდებლობა იყო საბჭოთა კავშირის შეიარაღებული ძალების ნაწილებმა დაარბიეს, რასაც მშვიდობიანი მოქალაქეების სიცოცხლე ემსხვერპლა