“თქვენ ნუ ღელავთ ჩვენს ბედზე, ქალბატონო თეონა” – ასე მიმართა ირაკლი ღარიბაშვილმა “იმედი LIVE-ს” წამყვანს თეონა გოგელიას.
ღარიბაშვილმა მის პარტიაში დაბრუნებაზე და არსებულ პრობლემებზე ისაუბრა. თუმცა, შიდაპრობლემებზე დეტალურად საუბრისგან თავი მაქსიმალურად შეიკავა.
“ჩვენს შიგნით რა ხდება ეს ჩვენი მოსაგვარებელია. ეს არაფრით არ უკავშირდება ჩვენს მოსახლეობას და მათ ბედს,” – განაცხადა ღარიბაშვილმა.
“მგონი თქვენს ბედს უკავშირდება. თქვენი მხარდამჭერები ღელავენ ბატონო ირაკლი, რომ არ დარჩნენ “ნაციონალური მოძრაობის” ამარა” – უპასუხა მას წამყვანმა და სწორედ ამას მოჰყვა ღარიბაშვილის საკმაოდ უკმეხი პასუხი.
ამასთან, ღარიბაშვილმა “ნაციონალურ მოძრაობაში” არსებულ დაპირისპირებასა და ჭორებზე ისაუბრა და იკითხა რატომ ინტერესდებიან ჟურნალისტები, მხოლოდ “ქართული ოცნების” შიდა პრობლემებით.
“ათჯერ უარესი დაპირისპირება ხდება სხვა პარტიებში. მე ვიცი, რომ ზუგდიდში ნაციონალური მოძრაობის კანდიდატად აპირებდნენ ნიკა მელიას დაყენებას და ჩანაცვლდა სააკაშვილის მეუღლით. ფიზიკური დაპირისპირებაც კი მოხდა, როგორც ვიცი. რატომ არ საუბრობთ ამაზე? ან სხვები არ საუბრობენ ამ თემაზე… მაინც და მაინც აინტერესებთ “ქართულ ოცნებაში” რა ხდება,” – განაცხადა ირაკლი ღარიბაშვილმა.