გია ვოლსკი: ვენეციის კომისიის რეკომენდაციებზე ისეთივე პროფესიონალური მსჯელობა უნდა გაიმართოს, როგორიც ამ დოკუმენტშია

„უმრავლესობაში ვენეციის კომისიის რეკომენდაციებზე ისეთივე პროფესიონალური მსჯელობა უნდა გაიმართოს, როგორიც ამ დოკუმენტშია“, – ამის შესახებ საპარლამენტო უმრავლესობის წევრმა, გია ვოლსკიმ ვენეციის კომისიის დასკვნაზე საუბრისას განაცხადა.
თუმცა, დეპუტატი აცხადებს, რომ თავად ვენეციის მიერ გამოქვეყნებულ რეკომენდაციებს, ამ ეტაპზე, არ გასცნობია.
„დოკუმენტს მთლიანად არ გავცნობივარ. ერთი შეხედვით ვფიქრობ, რომ კითხვის ნიშანი გაჩნდება. მე პირადად, სერიოზული კითხვის ნიშანი მაქვს გამოცდების მოხსნის საკითხთან დაკავშირებით. დაბლა რგოლში მოსამართლეებმა უნდა იცოდნენ, რომ უზენაეს სასამართლოში არიან ადამიანები, რომლებიც თავიანთ ავტორიტეტს არა მარტო განვლილი გზით, ან ბიოგრაფიით ამტკიცებენ, არამედ – იმ გამოცდით, რომლის გავლაც მოუხდებათ. მე დარწმუნებული ვიყავი, რომ ეს გამოცდა მაღალ პროფესიონალურ დონეზე იქნებოდა ჩატარებული. მე კითხვის ნიშანი მაქვს და, ალბათ, მსჯელობის შემდეგ საბოლოო პოზიციაზე ჩამოვყალიბდები“, – განაცხადა გია ვოლსკიმ.
საქართველოს პარლამენტის თავმჯდომარე, ირაკლი კობახიძე მოსამართლეთა შერჩევის კანონპროექტთან დაკავშირებით ვენეციის კომისიის რეკომენდაციების გათვალისწინებას არ გამორიცხავს.
მისივე განმარტებით, რეკომენდაცია, რომ ამ მოწვევის პარლამენტმა არ შეავსოს უზენაეს სასამართლოში კვოტები, პოლიტიკურია და ორგანულ კანონში ვერ აისახება.
კობახიძის განცხადებით, შესაძლებელია ვენეციის კომისიის იმ რეკომენდაციის გათვალისწინება, რომელიც მოსამართლეების შერჩევის კრიტერიუმებიდან გამოცდის ამოღებას შეეხება.