მომავალი ოფიცრები ტელეკომპანია „რუსთავი 2“-ს ჯარის იმიჯის მიზანმიმართულად შელახვაში ადანაშაულებენ. პარალელურად, სააკაშვილის ხელისუფლების თავდაცვის ყოფილი მინისტრი, სამაუწყებლო კომპანიის მიერ გავრცელებული ცნობის საფუძველზე, თითქოს ამერიკელ სამხედროზე ქართველმა იუნკერმა იძალადა, საქმეში პროკურატურის ჩართვას ითხოვს.
დიმიტრი შაშკინმა ეს განცხადება მხოლოდ „რუსთავი 2“-თვის გააკეთა. დაგვიანებული ბრიფინგი მხოლოდ ერთი ტელევიზიისთვის გაიმართა და შაშკინს არ უხსენებია ამერიკის საელჩოს განცხადება, რომელშიც საქართველოს სტრატეგიული პარტნიორები ამ ძალადობის შესახებ დეზინფორმაციას კატეგორულად უარყოფენ.
ამერიკელ კადეტ ქალზე ძალადობის შესახებ ინფორმაცია გუშინ, თავდაცვის მინისტრმა ლევან იზორიამაც უარყო.
ლევან იზორიას განცხადებით, დეზინფორმაციული კამპანია საზოგადოებაში სახელმწიფო ინსტიტუტების, განსაკუთრებით თავდაცვის ძალების მიმართ, ნდობის ხარისხის შემცირებიკენ არის მიმართული.
“საუბარი იყო თითქოსდა იუნკერის მიერ განხორციელებულ ძალადობის ფაქტზე აშშ-ის სამხედრო მოსამსახურე გოგოს მიმართ, რაც არა მხოლოდ ჩვენს მიერ, არამედ, ასევე აშშ-ის საელჩოს მიერ იქნა კატეგორიულად უარყოფილი, ასეთ ფაქტს ადგილი არ ჰქონია. ეს ყოველივე იწვევს მართლაც დიდ აღშფოთებას“, – განაცხადა თავდაცვის მინისტრმა.