როგორია რუისთან მომხდარი ავარიისას დაშავებულების მდგომარეობა?

რუისში მომხდარი ავტოსაგზაო შემთხვევის დროს დაშავებული სამი ადამიანი გადაყვანილია „გორმედის“სამედიცინო ცენტრში, მათგან ორი არასრულწლოვანია.
ამის შესახებ „კვირას“, „გორმედის“ რეანიმაციული დეპარტამენტის ხელმძღვანელმა, დავით ყაზაიშვილმა განუცხადა.
“გორმედში შემოყვანილია სულ სამი დაშავებული. აქედან ორი დაშავებული არასრულწლოვანია. 14 წლის ბიჭს კიდურების მრავლობითი მოტეხილობა, მენჯის ძვლების მოტეხილობა, თავის ტვინის დაჟეჟილობა აღენიშნება, ხოლო 16 წლის გოგონას ხერხემლის ტრავმა აქვს მიღებული. იგეგმება ბიჭის გადაყვანა თბილისში, ბავშვთა სპეციალიზებულ სამედიცინო დაწესებულებაში. ამჟამად ორივე მათგანი რეანიმაციულ განყოფილებაშია მოთავსებული“, – განუცხადა “კვირას” დავით ყაზაიშვილმა
შეგახსენებთ, რომ თბილისი-სენაკი-ლესელიძის რუისის მონაკვეთზე მომხდარ ავტოსაგზაო შემთხვევას სამი ადამიანი ემსხვერპლა. დაშავებულები კი სამედიცინო დახმარების ცენტრებში გადაიყვანეს.
ავტომობილი, რომელშიც 8 ადამიანი იჯდა, გზის სავალი ნაწილიდან გადავიდა და ცეცხლი გაუჩნდა. გარდაცვლილები, სავარაუდოდ, საქართველოს მოქალაქეები არ არიან.
შინაგან საქმეთა სამინისტრომ მომხდარზე გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.