კახა კალაძე ილ დე ფრანსის რეგიონის პრეზიდენტს შეხვდა

თბილისის მერი, კახა კალაძე საფრანგეთში ვიზიტის ფარგლებში ილ დე ფრანსის რეგიონის პრეზიდენტს, ვალერი პეკრესს შეხვდა.
შეხვედრაზე საუბარი თბილისში არსებულ გამოწვევებსა და პარიზის გამოცდილების გაზიარების მნიშვნელობას შეეხო.
“საკმაოდ საინტერესო შეხვედრა გვქონდა ილ დე ფრანსის რეგიონის პრეზიდენტთან. პირველი, რასაც საუბარი შეეხო, ესაა ორ ქვეყანას შორის არსებული მეგობრული ურთიერთობა, რაც მისასალმებელია, თუმცა ძალიან დიდი რესურსი გვაქვს, რომ ეს ურთიერთობა კიდევ უფრო გავაღრმავოთ. ასევე, ვისაუბრეთ თბილისში არსებულ გამოწვევებზე. გვინდა, რომ ის გამოცდილება, რომელიც პარიზს სხვადასხვა მიმართულებით აქვს, გავიზიაროთ თბილისში. მათ მხარდაჭერა აღგვითქვეს სატრანსპორტო სფეროში თანამშრომლობის კუთხით. გარდა ამისა, საუბარი გვქონდა ეკოლოგიურ გამოწვევებზე და მათი მხრიდან თანადგომა გვექნება კონკრეტული პროექტების მიმართულებით. მიგვაჩნია, რომ ეს ვიზიტი საკმაოდ წარმატებული იქნება იმ თვალსაზრისით, რომ შევძლებთ, მათი მხარდაჭერითა და თანადაფინანსებით ერთობლივად განვახორციელოთ ჩვენი ქალაქისთვის მნიშვნელოვანი პროექტები, რომლებზეც დიდი ხანია, ვსაუბრობთ”, – განაცხადა კახა კალაძემ.
თავის მხრივ კი ილ დე ფრანსის რეგიონის პრეზიდენტმა აღნიშნა, რომ ფრანგულ მხარეს შეუძლია, პარიზის გამოცდილება საქართველოს დედაქალაქის განვითარების სამსახურში ჩააყენოს.
„როგორც მოგეხსენებათ, საქართველოსა და საფრანგეთს შორის ურთიერთობები ხანგრძლივი, ისტორიული და ტრადიციულად ძალიან კარგია. ბედნიერი ვარ, რომ ვმასპინძლობ თბილისის მერს პარიზის რეგიონში. ჩვენ საშუალება მოგვეცა, გვესაუბრა მომავალ თანამშრომლობაზე. ძირითადად, ეს ეხება ქალაქისთვის დამახასიათებელ გამოწვევებს; კერძოდ, საზოგადოებრივ ტრანსპორტს და ჩვენ შეგვიძლია, ჩვენი გამოცდილება ჩავაყენოთ საქართველოს დედაქალაქის განვითარების სამსახურში. ასევე, შეგვიძლია, დიდი ნახტომი გავაკეთოთ ამ მიმართულებით, რადგან საქართველო უკვე ციფრულ და ტექნოლოგიურ ეკონომიკაში წინწასული ქვეყანაა და შეგვიძლია, დიდი დროც მოვიგოთ ამ ახალი ტექნოლოგიების ჩართვით“, – აღნიშნა ვალერი პეკრესმა.
შეხვედრას ილ დე ფრანსის რეგიონის ვიცეპრეზიდენტი, ჟერომ შარტიე დაესწრო.