გიორგი გახარია არის ჩვენი გუნდის წევრი, 2012 წლიდან დღემდე ჩვენი გუნდის ისტორია არის ერთადერთი – ადამიანის უფლებების განმტკიცება, დემოკრატიის განმტკიცება და ქვეყანაში დემოკრატიული ინსტიტუტების გაძლიერება, – ამის შესახებ საქართველოს პარლამენტის თავმჯდომარე არჩილ თალაკვაძემ განაცხადა.
„გიორგი გახარია იყო ამ პროცესის მონაწილე და ამიერიდან კიდევ უფრო მეტად იქნება პასუხისმგებელი და ამ პროცესის მონაწილე. მინდა, იცოდეს ყველამ, რომ საქართველოს არჩევანი დემოკრატიის გაძლიერებისკენ, საქართველოს არჩევანი, რომ მოახდინოს ინტეგრაცია ევროპულ და ევროატლანტიკურ სტრუქტურებში, ეს არ არის ერთი რომელიმე მოქალაქის არჩევანი, ეს არის ხალხისა და ხელისუფლების საერთო არჩევანი. ასე რომ, თითოეული ჩვენი თანაგუნდელი, რა თქმა უნდა, იზიარებს იმ პასუხისმგებლობას, რომელიც საქართველოს მომავალს უკავშირდება. ჩვენ მთლიანად კონცენტრირებული ვართ ჩვენი ქვეყნის მომავალზე“, – განაცხადა არჩილ თალაკვაძემ.