ტელეკომპანია „იმედის“ ეთერში 28 იანვარს გასულ გადაცემაში „არენა“, ანალიტიკოსმა ნიკოლოზ მეტრეველმა განაცხადა, რომ ორი წლის წინ, ბერი გაბრიელ სალოსის ქუჩაზე ქართული სპეცსამსახურების მიერ ლიკვიდირებული ახმედ ჩატაევის სახელი, შესაძლოა, პოლიტიკურ მკვლელობებს უკავშირდებოდეს.
„ახმედ ჩატაევი ევროპაში რამდენიმე წლის განმავლობაში ძალიან საეჭვო საქმიანობაში იყო შემჩნეული. ამის მიუხედავად, თავის დროზე „ნაციონალურმა მოძრაობამ“ ჩატაევი საქართველოში გადმოიყვანა და შემდეგ რისთვის იყენებდა, კიდევ გაურკვეველია. ანუ რეალურად, „ნაციონალური მოძრაობა“ გახდა ტერორიზმის სპონსორი, „ნაციონალური მოძრაობის“ წევრები გახდნენ საერთაშორისო ბოროტების საქმის სპონსორები. ერთი რამ მინდა გითხრათ: ევროპაში ძალიან ზე-სერიოზული ჟურნალისტური გამოძიებაა დაწყებული, ეს ადამიანები მეც დამიკავშირდნენ, უბრალოდ ჯერჯერობით დეტალები არ მინდა გავახმაურო. როგორც გავიგე, ახმედ ჩატაევის სახელი რამდენიმე პოლიტიკურ მკვლელობასთან დაკავშირებით ამოტივტივდა, როგორც ევროპაში, ასევე, გარკვეული მინიშნებები არის საქართველოზეც. ამიტომ არ მინდა ეს თემა ახლა გავშალო, ამას თავად ევროპელი ჟურნალისტები გააკეთებენ“ – განაცხადა ნიკოლოზ მეტრეველმა.