მთავრობა მასშტაბური საპრივატიზებო პროექტის „100 საინვესტიციო შეთავაზება ბიზნესს“ გაგრძელებას გეგმავს. როგორც მთავრობის დღევანდელ სხდომაზე პრემიერმა გიორგი გახარიამ განაცხადა, მზადდება პროექტი, რომლის თანახმადაც საპრივატიზაციო ობიექტების ნუსხას წიაღისეულის 100 საბადო დაემატება.
„ბუნებრივი რესურსების მართვის მიმართულებით დღეს სახელმწიფო ახორციელებს ძალზე სერიოზულ რეფორმას, რომლის ძირითადი მიზანი გახლავთ, სასარგებლო წიაღისეულის ეფექტური მართვა და ასევე ეკოლოგიური სტანდარტების შესაბამისი დაცვა. სწორედ ამ კრიტერიუმების გათვალისწინებით, ეკონომიკის სამინისტრო უახლოეს პერიოდში გამოიტანს 100 დამატებით პროექტს, რომელიც ნიშნავს სასარგებლო წიაღისეულის რესურსების დამატებით პრივატიზებას, ბიზნესისთვის შეთავაზებას, რომელიც მისცემს საშუალებას ქვეყნის ეკონომიკას, უახლესი წლების განმავლობაში დამატებით, დაახლოებით, 120 მილიონის ინვესტირების ბაზისი შექმნას, ეს არის ძალზე მნიშვნელოვანი. მოგეხსენებათ, რომ ჩვენი ძირითადი ამოცანაა ყველა ის რესურსი, რომელიც დღეს არაეფექტურად არის გადანაწილებული სხვადასხვა სახელმწიფო ორგანოებში ან საერთოდ არ არის იდენტიფიცირებული, იყოს იდენტიფიცირებული და მაქსიმალურად ეფექტურად ჩაეშვას ეკონომიკაში, მოხდეს მისი იდენტიფიცირება“, – განაცხადა გახარიამ.