კრიმინალური ავტორიტეტის, ვატო ყიფიანის ადვოკატმა, მარიკა ფხალაძემ ჟურნალისტებს გააცნო ჩანაწერი, რომელშიც ყიფიანი ძმებ ფეიქრიშვილების ლიკვიდაციის მზადების საქმესთან დაკავშირებით მისი სახელის ხსენების შესახებ კომენტარს აკეთებს. ვატო ყიფიანი ჩანაწერში აღნიშნავს, რომ უნდა, მისი პოზიცია გასაჯაროვდეს.
„ნერვები მაქვს დაგლეჯილი. ეს ორი დღეა, ამაზე ვფიქრობ. ვერ მოვისვენე. ბევრჯერ ყოფილა სიტუაცია, რომ ჩემთვის რაღაც დაუბრალებიათ. დღეს სიბინძურეზე მიდის ლაპარაკი ხალხზე, რომელთანაც არაფერი მაკავშირებს. ნაცნობებიც არ არიან“, – აღნიშნავს ჩანაწერში ვატო ყიფიანი.
ვატო ყიფიანი ამბობს, რომ მზად არის, სიმართლის დასადგენად საქართველოში ჩამოვიდეს.
„თითქოს მე მინდოდა, ვისთანაც არ მაქვს არანაირი შეხება, იმათი აფეთქება. სიბინძურეზეა ლაპარაკი. მინდა, ხალხმა იცოდეს. მე მზად ვარ, როცა მეტყვიან, მაშინ ჩამოვიდე. ოღონდ სიმართლე დადონ, რაღაც სიბინძურეს ნუ ხატავენ, რომ ვატო ყველაფერზე წამსვლელი ადამიანია. ვატო არაფერ შუაში არ არის ამასთან და თუ ეს ნათელს მოჰფენს, მე მზად ვარ ჩამოვიდე.
მე ჩემს სახელს ვუფრთხილდები. მე არც გამოძიებას ვეხები – ასე იყო, ისე იყო. ძალიან კარგად იციან ჩემზე, როგორ იყო და რა იყო. თვითონ დაადგინონ და გააკეთონ. მასე თუ უნდათ, მე მზად ვარ, ჩამოვიდე. ჩემი თხოვნაა, რომ ეს ხალხმა მოისმინოს“, – საუბრობს ვატო ყიფიანი ჩანაწერში, რომელიც მედიას ადვოკატმა გააცნო.
სახელმწიფო უსაფრთხოების სამსახურის ინფორმაციით, უწყებამ ძმების, გიორგი და დავით ფეიქრიშვილების ლიკვიდაციის მცდელობის საქმე გახსნა. ამ საქმეზე ბათუმში დაკავებულ ოთხ და თბილისში აყვანილ ორ პირს აღკვეთის ღონისძიებად პატიმრობა 31 იანვარს შეეფარდათ. საქმეზე გამოძიება გრძელდება და არ არის გამორიცხული სხვა პირების პასუხისგებაში მიცემაც.