საქართველოს თავდაცვის ყოფილი მინისტრი, თინა ხიდაშელი “ევროპული საქართველოს” ერთ-ერთი ლიდერის, გიგი უგულავას დაკავებას სოციალურ ქსელში გამოეხმაურა.
ხიდაშელი მიიჩნევს, რომ უგულავა პოლიტიკური პატიმარია.
“დიახ, გიგი უგულავა პოლიტიკური პატიმარია!
სრულიად ერთმნიშვნელოვნად და ყოველგვარი მაგრამის გარეშე!
1. პოლიტპატიმარი არ ნიშნავს მხოლოდ იმ ადამიანებს ვისაც არასოდეს არავითარი დანაშაული ჩაუდენიათ და ისე ხელი მოჰკიდეს და ჩაყარეს ციხეებში.
2. თქვენთვის ცნობილი პოლიტპატიმრების უდიდეს უმრავლესობას რაღაც კანონი აუცილებლად ჰქონდა დარღვეული მაშინ როდესაც იჭერდნენ, პოლიციისადმი დაუმორჩილებლობა მაინც.
3. პოლიტპატიმარი ხარ თუ არა ჩადენილი დანაშაულის სიმძიმით არ იზომება. ის იზომება იმით:
ვინ გასამართლებს? რამდენად არსებობს ნდობა სასამართლოს, ან კონკრეტულად იმ მოსამართლეების მიმართ ვინც გაგასამართლა?
როდის გასამართლებენ?
რა გარემოებებში ხდება გასამართლება?
პირის კავშირი პოლიტიკასთან.
რასაც ახლა ვწერ სულ რაღაც 8 წლის წინ არც იმათ ესმოდათ დღეს, რომ სამართლიანად აღშფოთებულ გაგიჟებული არიან უგულავას დაპატიმრებით, მაგრამ ამ ქვეყანაში არის ხალხი, რომელსაც მაშინაც ესმოდა და ახლაც ესმით ემოციების და საკუთარი პოლიტგემოვნების მიღმა.
სრულიად ერთმნიშვნელოვნად შემიძლია ვთქვა რომ უგულავას ჩემზე დიდი კრიტიკოსი ან ჰყოლია როდესაც ისიც მერი იყო და მე საკრებულოს წევრი და ზუსტად იმ ყველაფერზე ვწერდი, ვკიოდი, ვაპროტესტებდი რაზეც დღეს ედავებიან. მაგრამ დღეს ის პოლიტპატიმარია და იმის მიუხედავად დღეს თავს გამარჯვებულად თვლით თუ არა, ფასი იქნება მაღალი რასაც თქვენ და ქვეყანა გადაიხდის ამ სისულელეში”, – წერს თინა ხიდაშელი.
ცნობისთვის, უზენაესმა სასამართლომ გუშინ, გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 3 წლით და 2 თვით პატიმრობა შეუფარდა.
