გონიოში, გეგმური წვრთნების დროს დაღუპული ჯარისკაცის, იაგო შარაძის დედამ, ელენე შარაძემ შიმშილობა დაიწყო. როგორც ელენე შარაძემ „ინტერპრესნიუსს“ განუცხადა, თურქული სამძებრო ხომალდი თითქმის თვალს მიეფარა და, სავარაუდოდ, სამძებრო ღონისძიებები შეწყდა, თუმცა ოჯახი საქმის კურსში ოფიციალურ სტრუქტურებს არ ჩაუყენებია.
ელენე შარაძის თქმით, თუ ხვალ დღის პირველ ნახევრამდე ოჯახს ინფორმაციას არ მიაწვდიან, ისინი გონიოში მცხოვრებ მოსახლეობასთან ერთად ცენტრალურ გზას გადაკეტავენ. „მთელი ღამე აქ ვრჩებით! ველოდებით, მოვიდეს აჭარის მთავრობის თავმჯდომარე ან ვინმე ზემდგომი და გვითხრას, რა ხდება, რატომ წავიდა თურქული გემი. გემი თითქმის თვალს მიეფარა, აღარ ეძებენ ჩემს შვილს. მე მინდა ძებნა გააგრძელონ. ცოცხალ შვილს არ ვითხოვ, მკვდარი შვილის ცხედარი მინდა, რომ საფლავი მქონდეს. უვადო შიმშილობა დავიწყე, სიცოცხლის ბოლომდე შიმშილობას ვაცხადებ. თუ ვნახავ, რომ ჩემი შვილი ვერ მიპოვეს, ბენზინს გადავისხამ და დავიწვამ თავს. ან აქედან ჩემი შვილის ცხედრით წავალ ან მეც მკვდარს წამიღებენ“, – აღნიშნა ელენე შარაძემ.
