დღეს დიდი მითქმა-მოთქმაა, რომ ქვეყნები იკეტება და კარანტინშია ხალხი, მაგრამ საოცარი რამ მოხდა, მადლობა ღმერთს, ჩვენს ხალხს და ხელისუფალს, საოცარი ერთიანობა გამოაჩინეს, – ამის შესახებ ალავერდის მიტროპოლიტმა, მეუფე დავითმა წირვის დასრულების შემდეგ განაცხადა.
„შიში ყოველთვის ურწმუნოებიდან მოდის. დღეს დიდი მითქმა-მოთქმაა, რომ ქვეყნები იკეტება და კარანტინშია ხალხი, მაგრამ საოცარი რამ მოხდა, მადლობა ღმერთს ჩვენს ხალხს და ხელისუფალს, საოცარი ერთიანობა გამოაჩინეს. ღმერთმა დაუშვა და ეს გამოცდა ჩვენმა ერმა კარგად ჩააბარა. გუშინ მელაპარაკა ერთი ადამიანი, რომლის სასტუმროშიც არიან უცხოეთიდან ჩამოსული ადამიანები. არც ერთ თანამშრომელს, არც დიდს და არც პატარას არ დაუტოვებია თავისი სამსახური, რომელიც ნამდვილად ღვთის წყალობით მათთვის გვირგვინი იქნება. ეს სამაგალითო შემართებაა. მათ ზურგი კი არ აქციეს, გვერდში დაუდგნენ. ყველას შეიძლება ეს განსაცდელი შეხვდეს.
“საფრთხისაგან თავის არიდება არ არის სირცხვილი, სიფრთხილის დაცვა ღვთისთვის მოსაწონია, უგუნური თავმოწონებით უარის თქმა ამ სიფრთხილეზე კიდევ უფრო დამამძიმებელია იმიტომ, რომ მას საფუძვლად ამპარტავნობა უდევს. ამპარტავანი სძულს უფალს, ხოლო თავდამდაბალი, რომელიც სიფრთხილეს იცავს, გონიერებით ღვთისთვის საყვარელია და წყალობასაც მიიღებს. სიფრთხილე დღეს აუცილებლად უნდა დავიცვათ. ზიარება ეს ის საიდუმლოა, რომელსაც ადამიანის გონება ვერ მიწვდება და რომელსაც ადამიანის ენა ვერ გამოსთქვამს. ადამიანი თავისუფალია არჩევანში, იქნება საეკლესიო ჭურჭელიც და ერთჯერადი ჭიქაც, ზიარების შემდგომ სიტკბოების მისაღებად,“- თქვა ალავერდელმა მიტროპოლიტმა დავითმა.