ჩეხმა ტურისტმა სრულად აღწერა ის მარშრუტი, რომელიც მან გაიარა სიმპტომების გამოვლენის შემდეგ. ეს მნიშნველოვნად დაეხმარა ჩვენს ოპერატიულ სამსახურს, რომელმაც გუშინ გამოავლინა ყველა ის პირი, ვისთანაც ჩეხ ტურისტს ჰქონდა კონტაქტი, – ამის შესახებ უწყებათაშორისი საკოორდინაციო საბჭოს სხდომის შემდეგ გამართულ ბრიფინგზე ჯანდაცვის მინისტრმა, ეკატერინე ტიკარაძემ განაცხადა.
„იქიდან გამომდინარე, რომ პრევენციულ ზომებს ძალიან დიდი და კარგი ეფექტი აქვს, გადავწყვიტეთ ეს ღონისძიებები კიდევ უფრო გავამკაცროთ, რათა თავიდან ავიცილოთ ყველა შესაძლო გართულება. ჩეხ მოქალაქეს, რომელიც საქართველოში იმყოფებოდა, 8 მარტს გამოუვლინდა სიმპტომები. ამის შემდეგ ის დაბრუნდა სამშობლოში, სადაც მას კორონავირუსი დაუდგინდა. ის დაუკავშირდა ჩვენს საელჩოს და მოგვაწოდა ინფორმაცია თავისი დიაგნოზის შესახებ. ამის გამო გადავწყვიტეთ, სამთო-სათხილამურო კურორტებზე შეზღუდვები დავაწესეთ.
მინდა მადლობა გადავუხადო ჩეხეთის მოქალაქეს მისი მაღალი სამოქალაქო პასუხისმგებლობისთვის, ვინაიდან მან არ დამალა ფაქტი და სრულად აღწერა ის მარშრუტი, რომელიც გაიარა სიმპტომების გამოვლენის შემდეგ. ეს მნიშვნელოვნად დაეხმარა ჩვენს ოპერატიულ სამსახურს, რომელმაც გუშინ გამოავლინა ყველა ის პირი, ვისთანაც ჩეხ ტურისტს ჰქონდა კონტაქტი. ამ ეტაპზე იზოლირებულია 30 ადამიანი, სამ მათგანს გამოხატული სიმპტომატიკა აქვს. მიმდინარეობს კონტაქტების დამატებითი შესწავლა“, – განაცხადა ტიკარაძემ.
რაც შეეხება ინფორმაციას ჩეხი ტურისტის კახეთში ყოფნის შესახებ, ეკატერინე ტიკარაძის განცხადებით, ჩეხეთის მოქალაქე ამას არ ადასტურებს.
„მინდა დავამშვიდო ჩვენი მოქალაქეები და ვუთხრა, რომ თუ ისინი ამ პერიოდში იმყოფებოდნენ გუდაურში, ეს ჯერ კიდევ არ ნიშნავს, რომ მათ აუცილებლად შეიძლება ჰქონდეთ კორონავირუსი. ეს დაავადება გადაეცემა ადამიანს, როდესაც მას აქვს ინფიცირებულთან სულ მცირე 15-წუთიანი ინტენსიური კონტაქტი და პიროვნებასთან დაშორება 1 მეტრზე ნაკლებია. დანარჩენ შემთხვევებში ადამიანი რისკ ჯგუფში ვერ მოხვდება“, – აღნიშნა ჯანდაცვის მინისტრმა.
ჩეხეთის მოქალაქეს, რომელსაც 4-9 მარტს გუდაურში მოგზაურობის ისტორია ჰქონდა, სამშობლოში დაბრუნების შემდეგ კორონავირუსი დაუდგინდა. ამის გამო გუდაურის რესტორან „მთვრალი ალუბლის“ ორი თანამშრომელი თბილისში გამოკვლევაზე გადაიყვანეს, რესტორანი კი დაკეტეს.