საპარლამენტო უმრავლესობის ლიდერის, მამუკა მდინარაძის განცხადებით, პარლამენტში დაჩქარებული წესით დარეგისტრირდება ინიციატივა, რომლის მიხედვითაც კარანტინისა და თვითიზოლაციის წესების დამრღვევთათვის სავარაუდო ჯარიმა და შესაბამისი სასჯელი იქნება.
მისივე თქმით, დარღვევის ფაქტებზე მკაცრი რეაგირება მნიშვნელოვანია.
“კარანტინში არის რამდენიმე ასეული ადამიანი და თვითიზოლაციაში კიდევ უფრო მეტი. სამწუხაროდ, არის ცალკეული შემთხვევები, როდესაც ადამიანები თვითიზოლაციის წესს არღვევენ.
ამიტომ, ბუნებრივია, საპარლამენტო უმრავლესობა შეუერთდება საქართველოს პარლამენტის თავმჯდომარის ინიციატივას და დღესვე, დაჩქარებული წესით დარეგისტრირდება ინიციატივა, რომლის მიხედვითაც იქნება სავარაუდო ჯარიმა და შესაბამისი სასჯელი მათთვის, ვინც შეეცდება, დაარღვიოს კარანტინის და თვითიზოლაციის წესები და პირობები. ჩვენ უნდა ვიყოთ ადეკვატურად მკაცრები ასეთი შემთხვევების მიმართ”, – განაცხადა მდინარაძემ.