კორონავირუსით დაინფიცირებული საქართველოს მოქალაქის, რომელიც ამჟამად ერევნის საავადმყოფოშია მოთავსებული, მეჯვრისხევში 100-მდე კონტაქტი გამოიკვეთა.
როგორც “რეგიონულ კვირას“ მეჯვრისხევში მცხოვრებმა ერთ-ერთმა ადგილობრივმა განუცხადა, კორონავირუსით ინფიცირებული 55 წლის მამაკაცის 100-მდე კონტაქტს შემოწმება უკვე ჩაუტარდა.
“14 მარტს ჩამოვიდა ეს ადამიანი, სოფელშიც იყო გამოსული და ჩვეულებრივ ურთიერთობაში იყო ხალხთან. მე როგორც ვიცი, 100-მდე ადამინთან გავიდნენ კონტაქტზე, ვისთანაც ჰქონდა შეხება“, – უთხრა ადგილობრივმა “რეგიონულ კვირას”.
აღნიშნული ინფორმაცია “რეგიონულ კვირას” გორის მუნიციპალიტეტის საზოგადოებრივი ჯანდაცვის ცენტრის ხელმძღვანელმა მარინა გიუნაშვილმა დაუდასტურა. ამასთან, მან უარყო გავრცელებული ინფორმაცია მამაკაცის ცოლ-შვილის დაინფიცირების შესახებ.
“ამ დროისთვის კონტაქტები გამოიკვეთა და კვლავ მიმდინარეობს მოკვლევა, ზუსტს ციფრს ვერ გეტყვით. ამასთან, ცრუა ის ინფორმაცია, თითქოს ამ ადამანის ცოლი და შვილიც დაინფიცირებულები არიან. მათ კორონავირუსისთვის დამახასიათებელი სიმპტომები არ აღენიშნებათ, თუმცა რჩებიან დაკვირვების ქევშ“, განაცხადა მარინა გიუნაშვილმა.
ცნობისთვის, კორონავირუსით დაინფიცირების პირველი შემთხვევა შიდა ქართლში დღეს დადასტურდა. კოვიდ-19-ით ინფიცირებული პირი გორის მუნიციპალიტეტის სოფელ მეჯვრისხევის მკვიდრია და ის ტრაილერის მძღოლად მუშაობს. ინფიცირებულს 31 მარტს საზღვრის კვეთის დროს ტემპერატურა დაუფიქსირდა. ამ დროისთვის, საქართველოს მოქალაქე ერევანში, შესაბამის დაწესებულებაშია მოთავსებული.