წყალტუბოს ერთ-ერთი საკარანტინო სივრცე შესაძლოა, ვირუსის გავრცელების ახალი კერა გახდეს. როგორც ირკვევა იზოლაციაში მყოფმა პირმა წესები დაარღვია და მას შეხება ჰქონდა ამავე სასტუმროში მყოფ 10 სხვა პირთან. მოგვიანებით მას COVID-19 დაუდასტურდა.
“ზომები დაცული არ არის, ვინ სად გადადის და გადმოდის არაფერი კონტროლდება, ეს სასტუმრო თავიდანვე დასახური იყო, რადგან ის საკარანტინო სივრცისთვის არ იყო მოწყობილი. სასტუმროში დაინფიცირებულს 10 პირთან ჰქონდა კონტაქტი, თუმცა არ ვიცი ვინ არიან ისინი,” – აცხადებს წყალტუბოს საზოგადოებრივი ჯანდაცვის ცენტრის დირექტორი მარინა ტყეშელაშვილი.
წყალტუბოს საკარანტინო სივრცეში დაინფიცირებული პირი, ქუთაისის ინფექციურ საავადმყოფოში გადაიყვანეს. გარდა ამისა, აღნიშნულ კლინიკაში მოთავსებულია დედა-შვილი, რომელთაც კორონავირუსი დაუდასტურდათ. ჯამში კლინიკა 23 დადასტურებულ შემთხვევას მკურნალობს.
“გუშინ ღამე მივიღეთ COVID-19-ზე დადებითი პასუხი, ღამის საათებში კი აჭარიდან დედა-შვილი მივიღეთ, ბავშვი 9 წლის არის. ჩვენ სულ 23 დადასტურებული შემთხვევა გვაქვს, აქედან 3 ბავშვია, ორი მათგანი 6 წლის არის, ერთი კი 9 წლის.
პაციენტი ჩვენ წყალტუბოს საკარანტინო ზონიდან მივიღებთ და როგორც ირკვევა ის სხვადასხვა რაიონშია გადაადგილებული. როგორც ვიცი მისი ყველა კონტაქტი დადგენილია,” – აღნიშნა ქუთაისის კლინიკა “ლჯ და კომპანია – ფილტვისა და ინფექციურ პათოლოგიათა ცენტრის” მთავარი ექიმმა თემურ ნადირაძემ.